პარლამენტმა „უცხოელთა და მოქალაქეობის არმქონე პირთა სამართლებრივი მდგომარეობის შესახებ“კანონში ცვლილებას მხარი 83 ხმით დაუჭირა.

მომხსენებლის, ევროპასთან ინტეგრაციის კომიტეტის თავმჯდომარის პირველი მოადგილის, ვახტანგ თურნავას განცხადებით, კანონპროექტი მიზნად ისახავს მაღალკვალიფიციური უცხოელი IT სპეციალისტების მოზიდვას საქართველოში და კანონში არსებული რეგულაციების თანამედროვე IT ბაზრის მოთხოვნებთან შესაბამისად ადაპტირებას, რაც მნიშვნელოვნად გაამარტივებს და დააჩქარებს მათ შემოსვლას და დასაქმებას ქვეყანაში.

„სამწლიანი IT ბინადრობის ნებართვა წარმოადგენს კანონით განსაზღვრულ სპეციალურ სტატუსს, რომელიც უცხოელ IT პროფესიონალებს – დეველოპერებს, დიზაინერებს, ანალიტიკოსებს და სხვა ტექნოლოგიური პროფილის სპეციალისტებს აძლევს უნივერსალურ შესაძლებლობას ლეგალურად იცხოვრონ და იმუშაონ საქართველოში სამწლიანი ვადით“, - განაცხადა მომხსენებელმა.

მისი თქმით, ცვლილება შეეხება იმ უცხოელებს, რომლებიც პროფესიულად საქმიანობენ ინფორმაციული ტექნოლოგიების სფეროში და აქვთ დადასტურებული კვალიფიკაცია - შესაბამისი განათლება, სამუშაო გამოცდილება ან საერთაშორისო სერტიფიკატები.