პარლამენტში სტაჟიორთა შემაჯამებელი მოხსენებების წარდგენის ღონისძიება გაიმართა. ღონისძიების მონაწილეებს მისასალმებელი სიტყვით პარლამენტის თავმჯდომარის პირველმა მოადგილემ გიორგი ვოლსკიმ მიმართა, რომელმაც განსაკუთრებული ყურადღება სტაჟიორების პროფესიულ განვითარებასა და საპარლამენტო საქმიანობაში მათ ჩართულობაზე გაამახვილა.

„მნიშვნელოვანია, სტაჟიორებმა ცოდნა და გამოცდილება მიიღონ და ამავე დროს, თავისი წვლილი შეიტანონ საპარლამენტო საქმიანობაში“, - განაცხადა გიორგი ვოლსკიმ.

მოწვეულ სტუმრებს პარლამენტის თავმჯდომარის მოადგილე ნინო წილოსანი მიესალმა და სტაჟიორთა პროგრამის მნიშვნელობაზე ისაუბრა.

„სტაჟირების სამთვიანი პროგრამა უკვე დასასრულს უახლოვდება. ეს არაჩვეულებრივი შესაძლებლობა იყო ახალგაზრდებისთვის, რომ არა მხოლოდ პროფესიული თვალსაზრისით გაზრდილიყვნენ, არამედ მონაწილეობა მიეღოთ იმ პროცესებში, რომლებიც ქვეყნის ბედსა და საკანონმდებლო სივრცეს უკეთესობისკენ ცვლის. შევეცადეთ, რომ ეს პერიოდი მათთვის საინტერესო და შედეგიანი ყოფილიყო“, - განაცხადა ნინო წილოსანმა.

ღონისძიების ფარგლებში ახალგაზრდებმა, რომლებიც სტაჟირებას საქართველოს პარლამენტში გადიან, მათთვის საინტერესო თემებზე მოხსენებები წარადგინეს.

ღონისძიებას პარლამენტის წევრები, სტაჟიორები და პარლამენტის აპარატის თანამშრომლები ესწრებოდნენ.