საქართველოს პარლამენტის საფინანსო-საბიუჯეტო კომიტეტმა საჯარო სამართლის იურიდიული პირის – საქართველოს საპენსიო ფონდის საქმიანობის 2025 წლის ანგარიში მოისმინა.

მომხსენებელმა, საპენსიო ფონდის გენერალური დირექტორის მოვალეობის შემსრულებელმა, გიორგი ჭიჭინაძემ ფონდის მიერ საანგარიშო პერიოდში გაწეული საქმიანობისა და განხორციელებული ღონისძიებების შესახებ ისაუბრა.

„2025 წელი საქართველოს საპენსიო ფონდისთვის მნიშვნელოვანი ინსტიტუციური გარდაქმნის წელი იყო. 2024 წელს „დაგროვებითი პენსიის შესახებ“ კანონში ცვლილებები განხორციელდა. შესაბამისად, 2025 წლის 1 მაისიდან შეიცვალა საპენსიო ფონდის მმართველობითი სტრუქტურა და საქმიანობის მარეგულირებელი ნორმები. შეიცვალა საპენსიო სააგენტოს სახელწოდება და ორგანიზაცია ჩამოყალიბდა - სსიპ საქართველოს საპენსიო ფონდის სახელწოდებით, ფონდის უმაღლეს ხელმძღვანელ ორგანოდ განისაზღვრა საქართველოს საპენსიო ფონდის მმართველობითი საბჭო, ხოლო საპენსიო ფონდის აღმასრულებელ ორგანოდ განისაზღვრნენ აღმასრულებელი დირექტორები: გენერალური დირექტორი, მთავარი საინვესტიციო ოფიცერი, მთავარი რისკის ოფიცერი და შიდა აუდიტის უფროსი. მმართველობითმა საბჭომ, კანონით მინიჭებულ უფლებამოსილების ფარგლებში, საქმიანობა დაიწყო 2025 წლის 1 მარტიდან. საკანონმდებლო ცვლილებების საფუძველზე, მმართველობითი საბჭოს მიერ შეიქმნა და დაკომპლექტდა კანონით განსაზღვრული კომიტეტები“, - განაცხადა გიორგი ჭიჭინაძემ. 

მისი თქმით, 2025 წლის ბოლოსთვის საპენსიო ფონდის აქტივების წმინდა ღირებულებამ 8.2 მილიარდ ლარს გადააჭარბა, რაც წინა წელთან შედარებით 2.2 მილიარდი ლარით მეტია. 

„აქტივების ზრდა განპირობებული იყო როგორც მონაწილეთა გაზრდილი საპენსიო შენატანებით, ასევე მაღალი საინვესტიციო შედეგებით. საანგარიშო პერიოდში ინვესტიციებიდან მიღებულმა მოგებამ ისტორიულ მაქსიმუმს — 796 მილიონ ლარს მიაღწია, ხოლო ფონდის დაარსებიდან დღემდე დაგენერირებულმა საინვესტიციო ამონაგებმა 2.2 მილიარდ ლარს გადააჭარბა. ასევე გაიზარდა დამსაქმებელთა და დასაქმებულთა რაოდენობა. სისტემას 125 ათასზე მეტი ახალი მონაწილე დაემატა და 25 ათასზე მეტი დამსაქმებელი. ეს ძირითადად გამოწვეული იყო ახალი დეკლარირების სისტემით. შესაბამისად, დღეს   რეგისტრირებულ მონაწილეთა საერთო რაოდენობამ 1.7 მილიონს გადააჭარბა. 2025 წელს 11,367 პირზე გაცემული პენსიებისა და საპენსიო აქტივების მოცულობამ 62.8 მილიონი ლარი შეადგინა“, - აღნიშნა მომხსენებელმა.

მისივე თქმით, 2025 წელი ასევე მნიშვნელოვანი იყო მონიტორინგისა და აღსრულების სისტემის განვითარების კუთხით. საკანონმდებლო ცვლილებების შედეგად დაინერგა საპენსიო შენატანების ვალდებულებების ავტომატური მონიტორინგისა და სანქცირების მექანიზმები, რამაც მნიშვნელოვნად გააძლიერა სისტემის ეფექტიანობა და მონაწილეთა ინტერესების დაცვა.

გიორგი ჭიჭინაძემ ასევე ისაუბრა საპენსიო ფონდის საოპერაციო, საინვესტიციო საქმიანობაზე, მონიტორინგსა და სხვა საკითხებზე.