სპორტისა და ახალგაზრდულ საქმეთა კომიტეტის სხდომაზე საქართველოს 2018 წლის სახელმწიფო ბიუჯეტის შესრულების 3 თვის ანგარიშზე ინფორმაცია მოისმინეს. ფინანსთა მინისტრის მოადგილემ, გიორგი კაკაურიძემ კომიტეტის წევრებს ფინანსური დოკუმენტის პირველი კვარტალის ძირითადი მონაცემები გააცნო და ბიუჯეტის შემოსულობების და მისი ხარჯვითი ნაწილის მიმართულებებზე ისაუბრა.

მინისტრის მოადგილის ინფორმაციით, 3 თვის მონაცემებით, მშპ-ს ზრდამ საშუალოდ 5.2% შეადგინა, საგარეო ვაჭრობის მაჩვენებელი წინა წელთან შედარებით 23.3%-ით გაიზარდა, ასევე გაზრდილია ფულადი გზავნილების და ტურიზმიდან მიღებული შემოსავალი.

გიორგი კაკაურიძის განცხადებით, ბიუჯეტის შემოსულობების ტემპების ზრდის შედეგად პირველი კვარტალის მონაცემებით, სახელმწიფო ბიუჯეტის შემოსავლების შესრულების მაჩვენებელმა 108 % შეადგინა. რაც შეეხება ბიუჯეტის ხარჯვით ნაწილს, მინისტრის მოადგილემ ცალკეული სამინისტროების მონაცემები წარმოადგინა და ყურადღება კომიტეტის დარგობრივ სახელმწიფო უწყებებზე გაამახვილა. ამ მიმართულებით გიორგი კაკაურიძემ განათლებისა და მეცნიერების და კულტურისა და სპორტის სამინისტროების ბიუჯეტიდან თანხების ათვისების მაჩვენებლებზე ისაუბრა და აღნიშნა, რომ ახალგაზრდობის სფეროში სახელმწიფო ხელშეწყობის ღონისძიებები 99.99%, სპორტის განვითარებაზე 96.3% და სპორტული და კულტურული ინფრასტრუქტურის რეაბილიტაციისთვის 99% შეადგინა. რაც შეეხება უშუალოდ კულტურისა და სპორტის სამინისტროს ათვისების მაჩვენებელს, 3 თვის მონაცემებით მან 82.6%. აღნიშნულთან დაკავშირებით გიორგი კაკაურიძემ აღნიშნა, რომ არსებული ჩამორჩენა შემდეგ კვარტალში გამოსწორდება და დაძლეული იქნება.

კომიტეტის თავმჯდომარე, მიხეილ ყაველაშვილი სტადიონების და ჭიდაობის დარბაზის მშენებლობის თემით დაინტერესდა და ფინანსთა და კულტურისა და სპორტის მინისტრის მოადგილეებისგან დეტალური ინფორმაცია მოისმინა. კომიტეტის წევრის, შოთა ხაბარელის შეკითხვა სამინისტროების გაერთიანების შედეგად დაზოგილ საბიუჯეტო ხარჯებს შეეხებოდა, რაზეც მომხსენებელმა განმარტა, რომ საუბარია სულ მცირე 700 ათას ლარზე, რაც ორი უწყების გაერთიანებით გამოთავისუფლდა.

სხდომაზე კომიტეტის წევრმა, ფეხბურთის ფედერაციის ხელმძღვანელმა, ლევან კობიაშვილმა სპორტული ფედერაციების დაფინანსების საკითხზე ისაუბრა და აღნიშნა, რომ ფეხბურთის ფედერაცია წლიდან წლამდე სახელმწიფო ბიუჯეტიდან სულ უფრო ნაკლებ დაფინანსებას ითხოვს და საბოლოო მიზანს, სახელმწიფო თანხებიდან სრული გათავისუფლება წარმოადგენს.

სპორტისა და ახალგაზრდულ საქმეთა კომიტეტმა სახელმწიფო ბიუჯეტის პირველი კვარტლის შესრულების ანგარიში დადებითად შეაფასა.