პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე, აკაკი ზოიძე ამერიკული ფარმაცევტული კომპანიის, ფაიზერის (Pfizer) ცენტრალური და აღმოსავლეთ ევროპის რეგიონში სამედიცინო მიმართულების ხელმძღვანელს, ჰოდიკ მიქაელს და კომპანიის წარმომადგენლებს შეხვდა.

შეხვედრაზე მხარეებმა თამბაქოს კონტროლის პოლიტიკის მიმართულებით ქვეყანაში განხორციელებული საკანონმდებლო ცვლილებები მიმოიხილეს.

სტუმრები თამბაქოს კონტროლის კუთხით, კომიტეტის მიერ მომზადებულ ინიციატივებს და გატარებულ აქტივობებს მიესალმნენ და თამბაქოსთვის თავის დანებების კამპანიაში, ფარმაცევტული კომპანიის მხარდაჭერა გამოთქვეს.

აღინიშნა, რომ მნიშვნელოვანია თამბაქოზე თავის დანებების დამხმარე მედიკამენტოზური საშუალებები ხელმისაწვდომი და იაფი, სოციალურად დაუცველი მოსახლეობისთვის კი საერთოდ უფასოდ გაიცეს. ერთ-ერთ ასეთ ეფექტურ საშუალებას კი „ფაიზერის“ მიერ წარმოებული მედიკამენტი „ჩამპიქსი“ წარმოადგენს.

შეხვედრაზე მხარეებმა ერთობლივი პროექტის განხორციელების შესაძლებლობები განიხილეს, რომლის მიზანსაც „ჩამპიქსის“ ხელმისაწვდომობასთან ერთად, ექიმების გადამზადება წარმოადგენს, რომლებიც თამბაქოს მოხმარების შეწყვეტის მსურველ ადამიანებს მედიკამენტებთან ერთად, პირველად ფსიქოლოგიურ სერვისებს გაუწევს.

ფარმაცევტულ კომპანიის წარმომადგენლებთან შეხვედრას კომიტეტის თავმჯდომარის მოადგილე, ლევან კობერიძე, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, დაავადებათა კონტროლისა და საზოგადოებრივი ჯანმრთელობის ეროვნული ცენტრის და აშშ-ის საელჩოს წარმომადგენლები ესწრებოდნენ.