კობა კობალაძე ახალგაზრდული პარლამენტის თავდაცვისა და უსაფრთხოების კომიტეტის წევრებს შეხვდა
თავდაცვისა და უშიშროების კომიტეტის თავმჯდომარის მოადგილემ, ფრაქცია „ქართული ოცნება - ძლიერი საქართველოსთვის“ წევრმა კობა კობალაძემ, საინფორმაციო შეხვედრა გამართა ახალგაზრდული პარლამენტის თავდაცვისა და უსაფრთხოების კომიტეტის წარმომადგენლებთან.
შეხვედრის ფარგლებში დეპუტატი სტუდენტებს ესაუბრა ეროვნული უსაფრთხოების პრიორიტეტებსა და დემოკრატიულ პრინციპებზე, უსაფრთხოების პოლიტიკის კოორდინაციის მიმართულებით არსებული გამოწვევების, რუსეთიდან მომდინარე საფრთხეებისა და ამ საფრთხეების წინააღმდეგ ღონისძიებების შემუშავების საკითხებზე.
შეხვედრაზე ასევე გამახვილდა ყურადღება დეოკუპაციისა და საქართველოს ტერიტორიული მთლიანობის აღდგენის პოლიტიკაზე, სახალხო დიპლომატიის როლზე მშვიდობიანი გზით კონფლიქტის მოგვარების პროცესში. სტუდენტები განსაკუთრებით დაინტერესდნენ საქართველოს მხრიდან ოკუპირებული რეგიონების ე.წ. დამოუკიდებლობის არაღიარების პოლიტიკის განსამტკიცებლად გადადგმული ნაბიჯებითა და გატარებული ღონისძიებებით. ამავდროულად, ახალგაზრდული კომიტეტის წევრები დაინტერესდნენ თავდაცვისა და უშიშროების კომიტეტის საქმიანობის მიმართულეებით და როლით სახელმწიფო უსაფრთხოების პოლიტიკის დაგეგმვის პროცესში.
ახალგაზრდული პარლამენტის წევრებთან საუბრისას კობა კობალაძემ აღნიშნა, რომ ჩვენი სახელმწიფო რეგიონული არასტაბილურობისა და ტერორიზმის მხრივ მნიშვნელოვანი საფრთხეებისა და გამოწვევების წინაშე დგას, რომელთა გამკლავებასაც კომპლექსური მიდგომა და მიზანშეწონილი, გააზრებული გადაწყვეტილებები სჭირდება უსაფრთხოების პოლიტიკის კოორდინაციისა და დაგეგმვის პროცესში.
„საქართველოს ტერიტორიული მთლიანობისა და სუვერენიტეტის განმტკიცების პროცესში უმნიშვნელოვანესია სახალხო დიპლომატიის გააქტიურება. მხოლოდ ორმხრივი მოლაპარაკებების ფორმატი ვერ უზრუნველყოფს ოკუპირებულ რეგიონებსა თუ მიმდებარე ზონებში მცხოვრები მოსახლეობის მდგომარეობის გაუმჯობესებას. ჩვენი სახელმწიფოს პრიორიტეტია ტოტალური თავდაცვის რეჟიმზე გადასვლა, რაც სწორედ სამხედრო და სამოქალაქო კომპონენტების ურთიერთშეთანხმების შედეგად მიიღწევა. კომპლექსური და ყოვლისმომცველი მიდგომის გარეშე ვერ შევძლებთ ძლიერ და მრავალრიცხოვან მოწინააღმდეგესთან გამკლავებას. აუცილებელია თითოეულმა მოქალაქემ გააცნობიეროს სახელმწიფოს წინაშე საკუთარი ვალდებულება, დეოკუპაციის წარმატებული პოლიტიკის წარმოება დამოკიდებულია სწორედ სახელმწიფოსა და საზოგადოების ყველა სეგმენტის ჩართულობასა და მზაობაზე. მხოლოდ ამ შემთხვევაში შეგვეძლება ვისაუბროთ ტოტალურ თავდაცვაზე და სახელმწიფოს თავდაცვისუნარიანობის განმტკიცებაზე“.
