პარლამენტის საგარეო ურთიერთობათა კომიტეტის წევრი ანი მიროტაძე მომავალ მსახიობებს შეხვდა, რომლებმაც ამერიკის დრამატული ხელოვნების აკადემიაში  სამსახიობო დაოსტატების კურსების გავლის უფლება შესარჩევი კონკურსის შედეგად მოიპოვეს.

თბილისის შოთა რუსთაველის თეატრისა და კინოს სახელმწიფო უნივერსიტეტის დრამის ფაკულტეტის მეოთხე კურსის სტუდენტებმა ნიკა გორდეზიანმა და გიორგი ღარიბაშვილმა ამერიკის დრამატული ხელოვნების აკადემიის მიერ გამოცხადებული კონკურსი წარმატებით გაიარეს და მსოფლიოს მასშტაბით შერჩეულ 12 ახალგაზრდასთან ერთად ლოს-ანჟელესში მიემგზავრებიან. ისინი სამსახიობო დაოსტატების ორთვიან გაუმჯობესებულ კურსს გაივლიან, რაც სამომავლოდ მათ დიდ პერსპექტივებს უხსნის. ამ კურსების დროს დაგეგმილია მსოფლიოში ცნობილი მსახიობების მასტერკლასები.

„ეს ახალგაზრდები საქართველოდან პირველები არიან, ვისაც გაუჩნდა შანსი ამერიკის დრამატული ხელოვნების აკადემიაში გაიღრმაოს ცოდნა სამსახიობო ხელოვნებაში და როდესაც ასეთი შანსი ჩნდება, ჩვენ ყველანი ვალდებული ვართ დახმარება აღმოვუჩინოთ მათ“, - განაცხადა ანი მიროტაძემ, რომლის დახმარებითა და ძალისხმევით, საგარეო საქმეთა და კულტურისა და ძეგლთა დაცვის სამინისტროების, ასევე საქართველოში ამერიკის საელჩოს მხარდაჭერით  სტუდენტების ამერიკის შეერთებულ შტატებში დროულად გამგზავრების საკითხი მოგვარდა. ახალგაზრდებისთვის სამსახიობო დაოსტატების კურსები 20 ივნისს იწყება,  ამ დღეებში კი წარმატებული სტუდენტები ბაკალავრიატის დამამთავრებელ გამოცდას ჩააბარებენ.

ანი მიროტაძემ ახალგაზრდა მსახიობებს გზა დაულოცა და შემოქმედებითი წარმატებები უსურვა.