ფრაქცია „ნაციონალური მოძრაობის” წევრი ნიკანორ მელია USAID-ის დირექტორის მოადგილეს ევროპისა და ევრაზიის საკითხებში ბროკ ბირმანს შეხვდა, რომელიც საქართველოში ღია მმართველობის პარტნიორობის (OGP) გლობალურ სამიტში იღებს მონაწილეობას. 

როგორც შეხვედრის შემდეგ ნიკანორ მელიამ განაცხადა, სტუმარი დაინტერესდა ქვეყანაში არსებული პოლიტიკური და ეკონომიკური მდგომარეობით, ისაუბრეს ასევე მომავალი თანამშრომლობის ზოგად ასპექტებზე.

მისივე თქმით, საუბარი ყველა იმ მნიშვნელოვან საკითხთან დაკავშირებით შედგა, რომლის წინაშეც დგას დღეს პოლიტიკური სპექტრი საქართველოში, ყურადღება დაეთმო ასევე ქვეყნის წინაშე მდგარ გამოწვევებსაც.

„საუბრის მნიშვნელოვანი ნაწილი დაეთმო ასევე მოახლოებულ საპრეზიდენტო არჩევნებს. მათ აინტერესებდათ, თუ რა სირთულეებს აწყდებიან საარჩევნო პროცესში ოპოზიციური პარტიები, მათ შორის, ჩვენი პოლიტიკური გაერთიანება“, - განაცხადა ნიკანორ მელიამ.

როგორც მან აღნიშნა, სტუმრების მხრიდან კიდევ ერთხელ, მკაფიოდ დადასტურდა მზადყოფნა, ხელი შეუწყონ ჩვენს ქვეყანაში დემოკრატიული პროცესების განვითარებას.

„ახალგაზრდა დემოკრატიული ქვეყანა ვართ და მას სჭირდება დიდი მხარდაჭერა, განსაკუთრებით ჩვენი მთავარი საერთშორისო პარტნიორების, მათ შორის, ამერიკის შეერთებული შტატების მხრიდან“, - განაცხადა პარლამენტის წევრმა.

შეხვედრას ესწრებოდა აშშ-ის ელჩის მოვალეობის შემსრულებელი ელიზაბეთ რუდი.