ფრაქცია „ნაციონალური მოძრაობის“ თავმჯდომარის მოადგილე სალომე სამადაშვილი ევროკავშირის სადამკვირვებლო მისიის ხელმძღვანელს, ერიკ ჰოგს შეხვდა.

შეხვედრის ერთ-ერთი მთავარი თემა იყო არჩილ ტატუნაშვილის ტრაგიკული გარდაცვალების საქმე და მისი ცხედრის ქართული მხარისთვის გადმოცემის საკითხი.

განხილული იყო, ასევე, უსაფრთხოების თვალსაზრისით ოკუპირებულ ტერიტორიებზე და მის მიმდებარე რეგიონებში არსებული ვითარება.

„ევროკავშირის სადამკვირვებლო მისია ძალიან აქტიურადაა ჩართული ყველა კრიზისის შედეგად მიმდინარე მოლაპარაკებებში. ჩვენ მოვისმინეთ მათი შეფასებები არჩილ ტატუნაშვილის ტრაგიკულ გარდაცვალებასთან და იმ ფაქტთან დაკავშირებით, რომ დღემდე ვერ ხერხდება ცხედრის გადმოცემა ჩვენი ქვეყნისთვის და მისი ოჯახისთვის. მოვისმინეთ ინფორმაცია, თუ რა კეთდება საერთაშორისო თანამეგობრობის მხრიდან იმისთვის, რომ უზრუნველყოფილი იქნეს ცხედრის დროული გადმოცემა ოჯახისთვის. ასევე, შევეხეთ ზოგადად, ოკუპირებულ ტერიტორიებზე და მიმდებარე რეგიონებში უსაფრთხოების და უშიშროების თვალსაზრისით შექმნილ ვითარებას“, - განაცხადა ფრაქცია „ნაციონალური მოძრაობის“ თავმჯდომარის მოადგილემ, სალომე სამადაშვილმა შეხვედრის კომენტირებისას.