პარლამენტის ევროპასთან ინტეგრაციის კომიტეტის თავმჯდომარე ლევან ბერძენიშვილი საქართველოს პარლამენტის სტაჟიორებს შეხვდა
პარლამენტის ევროპასთან ინტეგრაციის კომიტეტის თავმჯდომარემ, ლევან ბერძენიშვილმა პარლამენტის სტაჟიორებთან შეხვედრა გამართა. მან პარლამენტის საქმიანობაზე, მის სტრუქტურაზე, როლსა და პარლამენტში სტაჟირების გავლის შესაძლებლობის მნიშვნელობაზე ისაუბრა.
„ეს არის შესანიშნავი საშუალება იმისათვის, რომ გაეცნოთ საკანონმდებლო ორგანოს მუშაობას, იმედი მაქვს, რომ ერთ დღესაც, თქვენ ჩაანაცვლებთ ძველ თაობას“, - განაცხდაა ლევან ბერძენიშვილმა.
კომიტეტის თავმჯდომარემ განსაკუთრებული ყურადღება ევროპასთან ინტეგრაციის კომიტეტის ისეთ ფუნქციასა და ვალდებულებებზე გაამახვილა, როგორიცაა „პარტნიორობისა და თანამშრომლობის შესახებ შეთანხმების“ განხორცილების მონიტორინგი, ევროკავშირთან მიმართებით მთავრობის მიერ წარმოებული საქმიანობის, მათ შორის, „კანონმდებლობის ჰარმონიზაციის ეროვნული პროგრამის“ დროული შესრულება და ა.შ.
ლევან ბერძენიშვილმა კანონშემოქმედებით პროცესებზეც გააკეთა აქცენტი და სტაჟიორებს ვიზალიბერალიზაციისთვის ბოლო პერიოდში მიღებულ რამდენიმე კანონსა და მათი მიღების მნიშვნელობაზე ესაუბრა. ამ მხრივ, კომიტეტის თავმჯდომარემ, ანტიდისკრიმინაციული და „საჯარო სამსახურის შესახებ“ კანონები გამოყო.
ლევან ბერძენიშვილმა განსაკუთრებული ყურადღება ვიზალიბერალიზაციის საკითხის განხილვას დაუთმო, მან სტაჟიორებს დეტალურად გააცნო შენგენის ქვეყნებში უვიზო მიმოსვლის პროცედურები, წინაპირობები, ვიზალიბერალიზაციით გამოწვეული მოსალოდნელი დადებითი მხარეები და მისი განხორცილების სავარაუდო ვადები.
შეხვედრის ნაწილი კითხვა-პასუხის რეჟიმში წარიმართა. სტაჟიორების კითხვები სხვადასხვა საკითხებს შეეხებოდა, როგორიცაა შრომითი უფლებები, ეთნიკური უმცირესობების ენის დაცვა, ევროინტეგრაციის მხარდაჭერის გაზრდის მიზნით სახელმწიფო პოლიტიკის მნიშვნელობა და ა.შ.
საკადრო საკითხთა დეპარტამენტის ორგანიზებით სტაჟიორებისა და პრაქტიკანტების შეხვედრები სხვადასხვა კომიტეტის თავმჯდომარეებთან და კომიტეტის სხვა წარმომადგენლებთან სისტემურ ხასიათს ატარებს, რაც საკანონმდებლო პროცესებში მათი ჩართულობის ხარისხის ამაღლების და აღნიშნული პროცესების მეტი ღიაობის უზრუნველყოფის მიზნით ხორციელდება. ევროპასთან ინტერგრაციის კომიტეტის თავმჯდომარესთან, ლევან ბერძენიშვილთან შეხვედრას პარლამენტის საკადრო საკითხთა დეპარტამენტის უფროსი, დიანა ასათიანი დაესწრო.
