მიმდინარე წლის განმავლობაში სუამის თავმჯდომარე ქვეყანა აზერბაიჯანია. სუამ-ის საპარლამენტო ასამბლეაში საქართველოს პარლამენტის მუდმივმოქმედი დელეგაციის წევრებმა, ალექსანდრე ქანთარიამ და ვახტანგ ლემონჯავამ გაცნობითი ხასიათის შეხვედრა გამართეს, სუამ-ის ახლადარჩეულ გენერალურ მდივანთან, ალთაი ეფენდიევთან. შეხვედრაზე მხარეებმა ორგანიზაციის ფარგლებში მიმდინარე თანამშრომლობის ძირითადი საკითხები განიხილეს. მათ შორის, პოლიტიკური, ეკონომიკური, დარგობრივი და საპარლამენტთაშორისო თანამშრომლობის მიმართულებით. როგორც აღინიშნა სუამმა უნდა გააგრძელოს მუშაობა, რათა იგი გახდეს უფრო ეფექტური და მძლავრი ბერკეტი რეგიონული თანამშრომლობისთვის.

„აზერბაიჯანის გააქტიურება სუამის ქვეყნების ეკონომიკური და პოლიტიკური ურთიერთკავშირის აქტივაციისთვის არის ძალიან მნიშვნელოვანი. შეხვედრაზე ვისაუბრეთ სატრანზიტო სატრანსპორტო დერეფნის განვითარებაზე, აბრეშუმის გზის გამოყენებაზე, სხვადასხვა მიმართულებით - განათლების, სოფლის მეურნეობის, კულტურის სფეროებში თანამშრომლობაზე“, - განაცხადა ალექსანდრე ქანთარიამ, შეხვედრის დასრულების შემდეგ.

„ალთაი ეფენდიევს აქვს სერიოზული გამოცდილება და ურთიერთთანამშრომლობის ჩამოყალიბებული ხედვა. ვფიქრობთ, რომ ამ ორგანიზაციის ფუნქციონირებაში ის მოიტანს ახალ ენერგიას, რითაც სუამ-ის ფუნქციონალური დატვირთვა შემდეგი წლის განმავლობაში კიდევ უფრო გაიზრდება“, - აღნიშნა ვახტანგ ლემონჯავამ.

„ჩემთვის მნიშვნელოვანი იყო მცოდნოდა ქვეყნის პოზიცია და ინტერესები, თუ როგორ შეიძლება ის ავსახოთ საერთო პროექტებში და საქმეებში. შეხვედრაზე ქართველ კანონმდებლებთან ერთად გვქონდა აზრთა გაცვლა-გამოცვლა. მიმოვიხილეთ პოლიტიკური და ეკონომიკური ასპექტები. ვისაუბრეთ თუ რა ახალი შესაძლებლობები იხსნება ურთიერთთანამშრომლობისთვის. ჩვენი ხედვები, თანამშრომლობის პრიორიტეტები და მიმართულებები ერთმანეთისას ემთხვევა. ყველანი ვთანხმდებით, რომ სუამის ქვეყნები კიდევ უფრო მეტად გავერთიანდეთ და მჭიდროდ ვითანამშრომლოთ ეკონომიკურ პროექტებში“, - განაცხადა სუამ-ის გენერალურმა მდივანმა.