პარლამენტმა „ცოცხალი გენმოდიფიცირებული ორგანიზმების შესახებ“ კანონში ცვლილებებს მხარი დაუჭირა
საქართველოს პარლამენტმა მესამე მოსმენით, დაჩქარებული წესით განიხილა და 79 ხმით, მხარი დაუჭირა „ცოცხალი გენმოდიფიცირებული ორგანიზმების შესახებ“ კანონში ცვლილებებს.
პარლამენტის წევრებს ცვლილებების ძირითადი არსი ეკონომიკური პოლიტიკის კომიტეტის თავმჯდომარემ, შოთა ბერეკაშვილმა გააცნო.
ცვლილებების თანახმად, არსებული აკრძალვის პირობებში წესდება გამონაკლისი და დასაშვები ხდება საქართველოს ტერიტორიაზე ცხოველის საკვების წარმოების მიზნით, გადამუშავებისთვის განკუთვნილი ცოცხალი გენმოდიფიცირებული ორგანიზმების იმპორტი.
კანონპროექტით დგინდება აღნიშნული საქმიანობის განხორციელების სპეციალური სალიცენზიო რეჟიმი.
ლიცენზია გაიცემა მხოლოდ საქართველოს ტერიტორიაზე დაშვებულ ცოცხალ გენმოდიფიცირებულ ორგანიზმებზე, რომლებიც რეგისტრირებულია ევროკავშირის გენმოდიფიცირებული სურსათისა და ცხოველთა საკვების რეესტრში. ამასთან, კვლავ დაუშვებელი იქნება ცოცხალი გენმოდიფიცირებული სიმინდის, ხორბლისა და ვაზის იმპორტი.
ცვლილებებით განისაზღვრება ლიცენზიის მიღების პროცედურა, სალიცენზიო პირობები, საქმიანობის განმახორციელებლის ვალდებულებები, მათ შორის, გენმოდიფიცირებული ორგანიზმის გარემოში მოხვედრისა და სხვა პროდუქტებთან შერევის პრევენციის, მიკვლევადობის უზრუნველყოფის, ტრანსპორტირების, შენახვისა და გადამუშავების კონტროლის წესები.
გარდა ამისა, ფართოვდება ცოცხალი გენმოდიფიცირებული ორგანიზმების ერთიან რეესტრში ასახული ინფორმაციის ფარგლები და ზუსტდება შესაბამისი სახელმწიფო ორგანოების უფლებამოსილებები იმპორტის კონტროლისა და ზედამხედველობის პროცესში.
