ევროპასთან ინტეგრაციის კომიტეტის თავმჯდომარე, თინათინ ხიდაშელი ფონდი „ღია საზოგადოება საქართველოს“ ევროინტეგრაციის მიმართულების მენეჯერს, ვანო ჩხიკვაძეს შეხვდა.
 
მხარეებმა ფონდისა და კომიტეტის ურთიერთთანამშრომლობის სამომავლო გეგმები დასახეს. მათ იმ ერთობლივ პროექტზეც იმსჯელეს, რომელსაც რუმინეთის საგარეო საქმეთა სამინისტრო დააფინანსებს და ევროპული პოლიტიკის რუმინული ცენტრი („Romanian Center for European Policies“) ფონდ - „ღია საზოგადოება საქართველოსთან“ ერთად განახორციელებს.

„სამმხრივი პარტნიორობის ფარგლებში, (ევროპასთან ინტეგრაციის კომიტეტი, რუმინული მხარე და ფონდი „ღია საზოგადოება საქართველო") რამდენიმე სხვადასხვა ამოცანასთან ერთად, იგეგმება რეგიონული გასვლები, რომლის მიზანია საქართველოს პარლამენტის წევრებისა და ექსპერტების საზოგადოებასთან კომუნიკაცია და ევროკავშირთან დაკავშირებით მათი ცნობიერების ამაღლება. შეხვედრა მნიშვნელოვანი იყო იმ მხრივაც, რომ სექტემბერში დაიწყება პროექტი და შესაბამისად, კონკრეტული ღონისძიებები უნდა დავგეგმოთ“, - განაცხადა თინათინ ხიდაშელმა შეხვედრის დასრულების შემდეგ. მისივე თქმით, ფონდი - „ღია საზოგადოება საქართველო“ სხვა არასამთავრობო ორგანიზაციებთან ერთად, მუდმივ რეჟიმში ახდენს როგორც ასოცირების ხელშეკრულების, ასევე ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ“ შეთანხმების (DCFTA) მონიტორინგს. შესაბამისად, ძალზე მნიშვნელოვანია მათი გამოცდილების გაზიარება, - აღნიშნა თინათინ ხიდაშელმა. 

ამ პროექტის ფარგლებში გათვალისწინებულია ევროპასთან ინტეგრაციის კომიტეტის აპარატის თანამშრომელთა გადამზადება და სასწავლო ვიზიტი რუმინეთში.