ფრაქცია „ქართული ოცნება - რეგიონების განვითარებისთვის“ წევრის, კობა ლურსმანაშვილის ორგანიზებით, რეგიონული პოლიტიკისა და თვითმმართველობის კომიტეტი „სტუდენტური პარლამენტის“ წევრებს შეხვდა
19 მარტს, ფრაქცია „ქართული ოცნება - რეგიონების განვითარებისთვის“ წევრისა და ხარაგაული-ბაღდათის მაჟორიტარის, კობა ლურსმანაშვილის ორგანიზებით, „სტუდენტური პარლამენტის“ წევრი ახალგაზრდები რეგიონული პოლიტიკისა და თვითმმართველობის კომიტეტის თავმჯდომარეს ზაზა გაბუნიასა და კომიტეტის თავმჯდომარის მოადგილეს, ზუგდიდის მაჟორიტარს, მერაბ ქვარაიას შეხვდნენ.
შეხვედრის ერთ-ერთ მთავარ თემას ადგილობრივი თვითმმართველობის რეფორმა წარმოადგენდა. ზაზა გაბუნიამ სტუდენტებს კომიტეტის სამუშაო გეგმა გააცნო. კომიტეტის თავმჯდომარე „სტუდენტური პარლამენტის“ წევრებს ფისკალური დეცენტრალიზაციის მნიშვნელობაზე ესაუბრა და 2018 წელს დაგეგმილი რეფორმის ის სამი მიმართულება გააცნო, რომელთა სრულყოფაზე აღმასრულებელი და საკანონმდებლო ხელისუფლება ერთობლივად მუშაობს.
კომიტეტის თავმჯდომარემ დეცენტრალიზაციის პროცესს „კარგი მმართველობის“ მოდელი უწოდა და განაცხადა, რომ საკონსტიტუციო ცვლილებების შემდეგ, თვითმმართველობის რეფორმა ქვეყნისთვის ნომერ მეორე მნიშვნელობის ცვლილებად შეიძლება ჩაითვალოს.
„თვითმმართველობას არ ჰყავს უფროსი, იმის მიუხედავად, რომ საკანონმდებლო ორგანოში არსებობს კომიტეტი, რომელიც იღებს მთელ რიგ გადაწყვეტილებებს ამ მიმართულებით. ადგილობრივმა ხელისუფლებამ თავად უნდა მოაწესრიგოს მის კომპეტენციაში არსებული საკითხები. ამიტომ თვითმმართველობა უნდა იყოს თვითკმარი, რისთვისაც საჭიროა დამატებითი უფლებები. ეს პროცესი უკვე დაწყებულია - მაგალითად, სკოლების მართვის სარეაბილიტაციო და სამეურნეო საკითხები უკვე მუნიციპალიტეტების საქმე იქნება“ - აღნიშნა ზაზა გაბუნიამ.
მაჟორიტარული და საკანონმდებლო საქმიანობის შესახებ საკუთარი გამოცდილება სტუდენტებს ფრაქცია „ქართული ოცნება - რეგიონების განვითარებისთვის“ და რეგიონული პოლიტიკისა და თვითმმართველობის კომიტეტის წევრმა, კობა ლურსმანაშვილმაც გაუზიარა.
დეპუტატმა სტუდენტებს კიდევ უფრო მჭიდრო თანამშრომლობის მიზნით, მათი ინიციატივების გენერირება შესთავაზა. მსგავსი შეხვედრების გაგრძელების სურვილი გამოთქვა კომიტეტის თავმჯდომარის მოადგილემ, მერაბ ქვარაიამაც.
შეხვედრის დასკვნითი ნაწილი კითხვა-პასუხის რეჟიმში გაგრძელდა. ზაზა გაბუნიამ და კომიტეტის წევრებმა სტუდენტების მიერ დასმულ კითხვებს უპასუხეს და ახლო მომავალში კიდევ ერთ შეხვედრაზე შეთანხმდნენ.
