საქართველოს პარლამენტის წევრი თინათინ ხიდაშელი აგრძელებს სამუშაო ვიზიტს ამერიკის შეერთებულ შტატებში. ვაშინგტონში სტენფორდის „მომავლის ინსტიტუტში“ საპარლამენტო ღიაობისა და გამჭვირვალობის საკითხებზე გამართულ კონფერენციაზე, თინათინ ხიდაშელმა წარმოადგინა ვრცელი მოხსენება, თემაზე: „დემოკრატიის მომავალი, ტექნოლოგიური რევოლუციის პირობებში“. დეპუტატმა ყურადღება გაამახვილა კანონმდებლების ყოველდღიურ საქმიანობაში საზოგადოების, ამომრჩევლების თანამონაწილეობის მნიშვნელობაზე.

,,XXI საუკუნის ტექნოლოგიური გამოწვევები თვისობრივად ახალ მიდგომებსა და პოლიტიკურ გადაწყვეტილებებს მოითხოვს ჩვენგან, პოლიტიკოსებისაგან. თანამედროვე ტექნოლოგიები, სოციალური მედია არ უნდა განვიხილოთ როგორც მიზანი, არამედ უნდა გახდეს ძალიან მნიშვნელოვანი ინსტრუმენტი, რომელიც საზოგადოების წინაშე პასუხის გასაცემად უნდა გამოვიყენოთ. ჩვენს წინაშე შესაძლებლობებია, რომელზეც 20 წლის წინ ვერც კი იოცნებებდნენ- აღარ ვიყოთ დამოკიდებული მედიის ინტერესზე, ჟურნალისტის კითხვაზე, ტელევიზიის სარედაქციო პოლიტიკაზე და ვიყოთ მუდმივ კონტაქტში ამომრჩეველთან. ვესაუბროთ ყველაფერზე, რაც ჩვენთვისაც მნიშვნელოვანია და რაც ამომრჩეველსაც აინტერესებს. გვიჩნდება საშუალება უშუალო კონტაქტი დავამყაროთ საზოგადოებასთან, პირისპირ ვესაუბროთ ამომრჩეველს, გავმართოთ მათთან დისკუსია და არ ვიყოთ მხოლოდ ცალმხრივად, ტელეეკრანებიდან ლექციის წამკითხველი პოლიტიკოსები“ - განაცხადა თინათინ ხიდაშელმა.

დეპუტატი თანამედროვე ტექნოლოგიების მნიშვნელობასაც შეეხო და აღნიშნა - „მზარდი ტექნოლოგიური შესაძლებლობები მუდმივად უნდა გამოვიყენოთ, მაგრამ იმავდროულად უნდა გვახსოვდეს, რომ ვართ რა დისკუსიის მონაწილე, ისეთ პოზიციაზე არჩეული ვართ არა მხოლოდ იმიტომ, რომ დღევანდელი პოპულარობით ვისარგებლოთ, არამედ იმისთვის, რომ ვიყოთ ლიდერები და გამოვიყენოთ თანამედროვე ტექნოლოგია ჩვენი გზავნილის ლაკონურად, გასაგებად, ნათლად გავრცელებისათვის“- განაცხადა თინათინ ხიდაშელმა კონფერენციაზე.

თინათინ ხიდაშელის სამუშაო ვიზიტი ამერიკის შეერთებულ შტატებში გრძელდება. 20 თებერვალს მისი სიტყვით გამოსვლა სან-ფრანცისკოში იგეგმება, სადაც პოლიტიკაში ქალების გააქტიურების სტრატეგიაზე გაიმართება მსჯელობა.