საქართველოს პარლამენტის თავმჯდომარის მოადგილე, ზურაბ აბაშიძე 13 ოქტომბერს ნატოს საპარლამენტო ასამბლეაზე, საქართველოსთან დაკავშირებით გამართულ დისკუსიაზე სიტყვით გამოვიდა. სიტყვით გამოსვლისას, ზურაბ აბაშიძემ   ხაზგასმით ისაუბრა საოკუპაციო ხაზზე და რუსი სამხედროების მიერ მავთულხლართების გავლებაზე. ასევე, მათი მხრიდან ადამიანის უფლებათა კუთხით არსებულ მდგომარებაზე.
ამასთან, პარლამენტის თავმჯდომარის მოადგილემ, ზურაბ აბაშიძემ სიტყვით გამოსვლისას საპრეზიდენტო არჩევნებზეც გაამახვილა ყურადღება. შეგახსენებთ, რომ საქართველოს პარლამენტის თავმჯდომარის მოადგილე, ზურაბ აბაშიძე საქართველოს პარლამენტის მუდმივმოქმედ დელეგაციასთან ერთად, 11-14 ოქტომბერს ქ. დუბროვნიკში, ნატო-ს საპარალმენტო ასამბლეის რიგით 59-ე საშემოდგომო სხდომაში მიიღო მონაწილეობა. დუბროვნიკის სხდომას ესწრებოდნენ ნატო-ს 28 ქვეყნის 340-მდე პარლამენტარი და ასევე ჩრდილოეთ ამერიკისა და ევროპული ქვეყნების დელეგაციები.
საქართველოს დელეგაციის შემადგენლობაში შედიოდნენ: საქართველოს პარლამენტის თავმჯდომარის მოადგილე, ზურაბ აბაშიძე, ევროპასთან ინტეგრაციის კომიტეტის თავმჯდომარის პირველი მოადგილე, ლევან ბერძენიშვილი, საპარლამენტო უმცირესობის წევრი და საქართველოს პარლამენტის თავმჯდომარის მოადგილე, გიორგი ბარამიძე და თავდაცვისა და უშიშროების კომიტეტის თავმჯდომარე, ირაკლი სესიაშვილი, რომელიც  საქართველოს დელეგაციას ხელმძღვანელობდა.