კიევში, დემოკრატიისა და ეკონომიკური განვითარების ორგანიზაციის, სუამ-ის რიგით მე-8 საპარლამენტო ასამბლეისა და კომიტეტების სხდომა გაიმართა, რომლის მუშაობაში მონაწილეობა მიიღო სუამ-ის საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელმა, ზურაბ აბაშიძემ.

უკრაინის დედაქალაქში სუამ-ის საპარლამენტო ასამბლეის სამი კომიტეტის: სავაჭრო-ეკონომიკური, რეგიონალური უსაფრთხოების და განათლების, კულტურის, მეცნიერებისა და ეკოლოგიის კომიტეტების სხდომა გაიმართა, სადაც მონაწილეებმა კომიტეტების მიმართულებების მიხედვით მოხსენებები წარმოადგინეს და მომავალი შეხვედრებისათვის რეზოლუციის პროექტები შეიმუშავეს.

განათლების, კულტურის, მეცნიერებისა და ეკოლოგიის საკითხთა კომიტეტის თავმჯდომარემ, ზურაბ აბაშიძემ, სხდომაზე მოხსენებით გამოსვლისას საზოგადოების უნიფიკაციის საქმეში განათლების მნიშვნელობასა და განათლების სფეროში სამოქალაქო საზოგადოების ჩართულობის მნიშვნელობაზე ისაუბრა.

იურიდიული და პოლიტიკური საკითხების კომიტეტის მეოთხე სხდომა კიევში, 2015 ივნისში ჩატარდა, რომელზეც სუამ-ის კომიტეტების ისტორიაში პირველად შეათანხმეს და მოამზადეს რეზოლუცია ასამბლეისთვის დასამტკიცებლად.

დღის ბოლოს სუამ-ის საპარლამენტო ასამბლეის ბიუროს სხდომა გაიმართა, სადაც ასამბლეის საქმიანობის სამომავლო გეგმები განისაზღვრა.

სუამ-ის საპარლამენტო ასამბლეის მე-8 სხდომაში, საქართველოს, აზერბაიჯანის, უკრაინისა და მოლდოვას პარლამენტების, სხვადასხვა უწყებებისა და დიპლომატიური მისიების წარმომადგენლები, ასევე, სხვადასხვა მიმართულების ექსპერტები მონაწილეობენ.

სესიაზე საერთაშორისო პარტნიორებიდან ბალტიის ასამბლეის წევრი ქვეყნების დეპუტატები მონაწილეობენ.

მისასალმებელი სიტყვით გამოსვლისას საქართველოს პარლამენტის დელეგაციის ხელმძღვანელმა, ზურაბ აბაშიძემ საპარლამენტო ასამბლეის წლევანდელი აქტივობების აშკარა პროგრესი აღნიშნა და დეპუტატებს კვლავაც აქტიური თანამშრომლობისკენ მოუწოდა. მან მადლობა გადაუხადა სუამ-ის გენერალურ მდივანს საპარლამენტო ასამბლეის საქმიანობაში მნიშვნელოვანი წვლილის შეტანისთვის და გამოცდილ დიპლომატს მომავალ საქმიანობაში წარმატებები უსურვა.

სხდომის მსვლელობისას, სიტყვით არაერთხელ გამოვიდა სუამ-ის გენერალური მდივანი, ვალერი ჩეჩელაშვილი, რომელსაც იანვრიდან აზერბაიჯანის წარმომადგენელი, დიპლომატი ალთაი ეფენდიევი შეცვლის.

შეხვედრის ბოლოს საპარლამენტო ასამბლეამ ბალტიის ასამბლეასთან ერთად ერთობლივი განცხადება მიიღო და კომპეტენციის ფარგლებში შეიმუშავა და დაამტკიცა კომუნიკე. სხდომას უკრაინის დელეგაციის ხელმძღვანელი, ანატოლი მატვიენკო თავმჯდომარეობდა.

მომავალი წლიდან ასამბლეის თავმჯდომარეობას უკრაინისგან აზერბაიჯანს რესპუბლიკა გადაიბარებს.