აგრარულ საკითხთა კომიტეტმა პირველი მოსმენით განიხილა კანონპროექტები: „ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების შესახებ“ საქართველოს კანონში ცვლილების შეტანის თაობაზე“, კომიტეტზე ასევე იმსჯელეს „მიწის ნაკვეთებზე უფლებათა სისტემური და სპორადული რეგისტრაციის წესისა და საკადასტრო მონაცემების სრულყოფის შესახებ“ კანონში ცვლილების შეტანის შესახებ. კანონპროექტები დეპუტატმა იაგო ხვიჩიამ წარადგინა.

როგორც მომხსენებელმა აღნიშნა, მოქმედი კანონმდებლობით პირებს არ შეუძლიათ საკუთრებაში დაირეგისტრირონ 2007 წლის შემდეგ თვითნებურად დაკავებული ან მართლზომიერ მფლობელობაში არსებული მიწის ნაკვეთი და კანონში ცვლილება აუცილებელია ამ მოცემულობის შესაცვლელად.

იაგო ხვიჩიას განცხადებით კანონპროექტის ძირითადი არსია, რომ იურიდიულ და ფიზიკურ პირებს საშუალება მიეცეს 2007 წლამდე და 2007 წლის შემდეგ მათ მფლობელობაში არსებული მიწის ნაკვეთების საკუთრებაში რეგისტრაცია მოახდინონ.

„სისტემური რეგისტრაციის პირობებში, რომელიც 2025 წელს უნდა დასრულდეს, რეგიონებში მცხოვრები ყველა ადამიანი შეძლებს დაირეგისტრიროს მათ ფაქტიურ მფლობელობაში არსებული მიწის ნაკვეთები, რომელზეც მათ კვადრატში მყოფი მეზობლები თანხმობას განაცხადებენ, რაც ვფიქრობ, რომ საკმაოდ სამართლიანი პრინციპია“, - განაცხადა კომიტეტის თავმჯდომარემ ნინო წილოსანმა.

მისივე თქმით, შემოთავაზებული ინიციატივა გარკვეულ ხვრელებს გააჩენს, რომ ადამიანებმა არამართლზომიერად დაირეგისტრირონ არასასოფლო-სამეურნეო მიწები, ვინაიდან სასოფლო-სამეურნეო მიწების შემთხვევაში ამ პრობლემას სისტემური რეგისტრაცია აგვარებს.

„კიდევ უფრო მეტი პრობლემა ჩნდება იქ, სადაც შენობა-ნაგებობებზეა საუბარი. შესაბამისად, რისკი მაღალია, მართლზომიერ მფლობელობაში არსებული მიწის მომიჯნავედ თვითნებურად დაკავებული არასაცხოვრებელი დანიშნულების შენობა-ნაგებობის დაკანონება და მიერთება მოხდეს და ამის შესაძლებლობა გააჩინოს წარმოდგენილმა კანონპროექტმა“, - აღნიშნა კომიტეტის თავმჯდომარემ.

კომიტეტმა წარმოდგენილ კანონპროექტებს მხარი არ დაუჭირა.