ალექსანდრე მოწერელია საქართველოში ავსტრიის რესპუბლიკის საგანგებო და სრულუფლებიან ელჩს შეხვდა
საქართველოს პარლამენტის ავსტრიის რესპუბლიკის პარლამენტთან მეგობრობის ჯგუფის წევრი ალექსანდრე მოწერელია საქართველოში ავსტრიის რესპუბლიკის საგანგებო და სრულუფლებიან ელჩს, თომას მიულმანს შეხვდა.
შეხვედრაზე ძირითადი ყურადღება ორ ქვეყანას შორის მჭიდრო ურთიერთობას და სამომავლო თანამშრომლობის საკითხებს დაეთმო.
განსაკუთრებით კი აქცენტი ავსტრიის ტიროლის ფედერალურ მიწას და სამეგრელო-ზემო სვანეთის მხარეს შორის ურთიერთთანამშრომლობის მემორანდუმით განსაზღვრული ურთიერთობის გაღრმავებასა და სამომავლო თანამშრომლობაზე გაკეთდა.
„ტიროლის რეგიონმა და სამეგრელო-ზემო სვანეთის რეგიონმა მეგობრობის და თანამშრომლობის შესახებ ხელშეკრულება ამ ცოტა ხნის წინ გააფორმეს. სწორედ ამ ხელშეკრულებიდან გამომდინარე, ჩვენ ვისაუბრეთ იმ შესაძლებლობებზე, რაც შეიძლება გამოყენებულ იქნეს ჩვენს რეგიონებს შორის თანამშრომლობის კუთხით. ჩემი მხრიდან გამოვთქვი სურვილი, რომ ჩემი შემდგომი ვიზიტისას ავსტრიაში შევხვდე როგორც კოლეგებს, ასევე, ტიროლის რეგიონის ხელმძღვანელობას, რა დროსაც ჩვენი რეგიონების სამომავლო თანამშრომლობის თაობაზე ვიმსჯელებთ“, - განაცხადა ალექსანდრე მოწერელიამ შეხვედრის შემდეგ.
