საპარლამენტო პოლიტიკური ჯგუფის „საქართველოსთვის“ წევრი ანა ბუჩუკური ეუთო-ს დემოკრატიული ინსტიტუტებისა და ადამიანის უფლებათა ოფისის (ODIHR) საჭიროების შემფასებელი მისიის წარმომადგენლებს შეხვდა.

როგორც შეხვედრის დასრულების შემდეგ ანა ბუჩუკურმა განაცხადა, ეუთოს წარმომადგენლებს ქვეყანაში მიმდინარე საკითხების შესახებ ესაუბრა.

„შეხვედრისას აღვნიშნე, რომ არჩევნების პროცესის მანიპულირება უკვე დაწყებულია და ეს არ ხდება უშუალოდ არჩევნების დღეს. ავუხსენი თუ რა განსხვავებაა ამჟამინდელ ვითარებასა და 2020-2021 წლების საარჩევნო მოცემულობას შორის. მათ შორის როდესაც საქმე ეხება კონკრეტულ სახელმწიფო ინსტიტუტებს, რომელთაგან ზოგიერთი გაუქმდა, ზოგი კი ერთპარტიულად დაიქვემდებარა მმართველმა გუნდმა. ჩვენ მუდმივ რეჟიმში ვაწვდით ინფორმაციას როგორც ODIHR-ს, ასე ყველა საერთაშორისო ორგანიზაციას, რომელიც ფოკუსირებულად მუშაობს არჩევნებზე, რომ ჩვენი საერთაშორისო პარტნიორების ყურადღება არ მოდუნდეს“, - განაცხადა ანა ბუჩუკურმა.

მისივე თქმით, შეხვედრაზე საუბარი შეეხო „უცხოური გავლენის გამჭვირვალობის შესახებ“ კანონსაც.

„რა თქმა უნდა, ყველას ესმის, რომ ამ კანონის მიზანიც საბოლოოდ არჩევნებს უკავშირდება, რომ მოხდეს როგორც ქვეყნის შიგნით ისე გარე აქტორების დისკრედიტაცია, რომელთაც არჩევნების პროცესზე სადამკვირვებლო მისია აქვთ“, - განაცხადა ანა ბუჩუკურმა.