საქართველოს პარლამენტის განათლებისა და მეცნიერების კომიტეტის თავმჯდომარის მოადგილე ბაია კვიციანი, შვედეთის სამეფოში სამუშაო ვიზიტის ფარგლებში, შვედეთის პარლამენტის საქართველოს პარლამენტთან მეგობრობის ჯგუფის ხელმძღვანელს, გუდრუნ ბრუნეგარდს და ჯგუფის წევრებს, სუზენ ნორდსტრომს და ჰანა განარსონს შეხვდა.

შეხვედრის მიზანი იყო ორ ქვეყანას შორის არსებული მჭიდრო ურთიერთობების მნიშვნელობის ხაზგასმა და სამომავლო ურთიერთობების განსაზღვრა.

ბაია კვიციანმა შვედურ მხარეს მადლობა გადაუხადა საერთაშორისო დონეზე საქართველოს მიმართ გამოხატული მხარდაჭერისთვის. შეხვედრაზე განსაკუთრებული ყურადღება დაეთმო საქართველოს ევროკავშირში გაწევრიანების პროცესს.

საქართველოს მხარემ იმედი გამოთქვა, რომ ევროკავშირის წევრი ქვეყნები ევროკომისიის რეკომენდაციას გაიზიარებენ და მიმდინარე წლის დეკემბერში ევროპული საბჭო საქართველოსთვის ევროკავშირის წევრობის კანდიდატი ქვეყნის სტატუსის მინიჭების გადაწყვეტილებას მიიღებს.

მხარეებმა, ასევე განიხილეს მომავალ წელს შვედეთის პარლამენტის მეგობრობის ჯგუფის საქართველოში ვიზიტის საკითხი.

შეხვედრას შვედეთის სამეფოში საქართველოს საგანგებო და სრულუფლებიანი ელჩი ირაკლი ხუცურაული და საელჩოს წარმომადგენლები ესწრებოდნენ.