ბავშვის უფლებათა დაცვის მუდმივმოქმედი საპარლამენტო საბჭოს ორგანიზებით, დაუნის სინდრომის დღესთან დაკავშირებული ღონისძიება გაიმართა.

„უნდა აღინიშნოს, რომ ეს არ არის პირველი შემთხვევა, როდესაც პარლამენტი დაუნის სინდრომის შესახებ საზოგადოების ცნობიერების ამაღლების სოლიდარობის გლობალურ კამპანიას უერთდება. პარლამენტი 2017 წლიდან ყოველწლიურად ატარებს სხვადასხვა ღონისძიებას და წვლილი შეაქვს დაუნის სინდრომის შესახებ ცნობიერების ამაღლებაში. ბავშვის უფლებათა დაცვის მუდმივმოქმედი საპარლამენტო საბჭო კი წელს პირველად ჩაერთო სოლიდარობის ამ გლობალურ კამპანიაში, რომლის გზავნილია - „დავასრულოთ სტერეოტიპები“. იმედი მაქვს, ჩვენ მოვახერხებთ და სტერეოტიპებს, სტიგმას, რაც ამ მიმართულებით არსებობს ჩვენი აქტიურობით და თანადგომით დავამარცხებთ“, - განაცხადა ბავშვის უფლებათა დაცვის მუდმივმოქმედი საპარლამენტო საბჭოს თავმჯდომარე ბაია კვიციანმა.

შეხვედრაზე, რომელზეც მოწვეული იყვნენ არასამთავრობო ორგანიზაციის „თანადგომა“, ასოციაცია „ანიკას“, სკოლა „აისის“, გაეროს ბავშვთა ფონდის, განათლების, მეცნიერებისა და ახალგაზრდობის და ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროების წარმომადგენლები, ასევე დაუნის სინდრომის მქონე ბავშვები და ახალგაზრდები, მათი მშობლები, იმსჯელეს შეზღუდული შესაძლებლობების მქონე ბავშვების საჭიროებებზე, მათთვის ახალი დამხმარე სასწავლო ტექნოლოგიების, მათ შორის, ციფრული ტექნოლოგიების დანერგვაზე, ასევე სასწავლო პროცესში ადაპტირებული ტექნიკის შემოღების შესახებ.

შეთანხმდნენ, რომ წამოჭრილ საკითხებზე შესაბამის სახელმწიფო და არასამთავრობო სტრუქტურებს შორის კომუნიკაცია კიდევ უფრო აქტიური გახდება, რათა ბავშვთა უფლებების მიმართულებით დღეს არსებული მექანიზმები ყველა ბენეფიციარისთვის ცნობილი და ხელმისაწვდომი გახდეს.

შეხვედრაში ასევე მონაწილეობდა ბავშვის უფლებათა დაცვის მუდმივმოქმედი საპარლამენტო საბჭო წევრი გრეტა წიწავა.

21 მარტი - დაუნის სინდრომის მსოფლიო დღე, საქართველოში 2012 წლიდან აღინიშნება. ამ დღესთან დაკავშირებით ცნობიერების ამაღლების მიზნით, დაუნის სინდრომის შესახებ კვირეული მიმდინარეობს.