პარლამენტის დიასპორისა და კავკასიის საკითხთა კომიტეტის თავმჯდომარე, საქართველო-თურქეთის საპარლამენტო მეგობრობის ჯგუფის ხელმძღვანელი ბექა ოდიშარია თურქეთის დიდი ეროვნული ასამბლეის საგარეო საქმეთა კომიტეტის თავმჯდომარეს და წევრებს შეხვდა.

შეხვედრაზე რეგიონში არსებული ვითარება და ორ ქვეყანას შორის სხვადასხვა მიმართულებით თანამშრომლობის სამომავლო პერსპექტივები მიმოიხილეს. მხარეებმა თურქეთში მომხდარი მიწისძვრით დაზარალებული მოსახლეობის დასახმარებლად საქართველოს მხრიდან გაწეულ დახმარებაზე ისაუბრეს.

„განვიხილეთ თანამშრომლობის სამომავლო გეგმები. საუბარი შეეხო თურქეთში დატრიალებულ ტრაგედიას და იმ ჰუმანიტარულ დახმარებას და თანადგომას, რომელიც საქართველოს მთავრობის მხრიდან მყისიერად იქნა გაწეული. სტუმრებმა მადლიერება გამოთქვეს აღნიშნულთან დაკავშირებით. ვისაუბრეთ რეგიონში სტაბილურობის მნიშვნელობაზე და სავაჭრო ურთიერთობებზე“, - განაცხადა ბექა ოდიშარიამ.

შეხვედრაში ასევე მონაწილეობდნენ თურქეთის რესპუბლიკის პარლამენტთან მეგობრობის ჯგუფის წევრები რესან კონცელიძე, ალექსანდრე ტაბატაძე და ანზორ ბოლქვაძე.