დარგობრივი ეკონომიკისა და ეკონომიკური პოლიტიკის კომიტეტმა „დიზაინის შესახებ“ კანონში ცვლილებას მხარი დაუჭირა
დარგობრივი ეკონომიკისა და ეკონომიკური პოლიტიკის კომიტეტმა პირველი მოსმენით განიხილა „დიზაინის შესახებ“ კანონში ცვლილება, თანმდევ კანონპროექტებთან ერთად.
როგორც მთავრობის საპარლამენტო მდივანმა ვახტანგ ბაჩიაშვილმა განაცხადა, კანონპროექტის ერთ-ერთი სიახლეა დიზაინის ხელახალი რეგისტრაციის პროცედურის შემოღება, რომელიც წარმოადგენს ხანგრძლივი სასამართლო დავების ალტერნატივას.
მისი განმარტებით, აღნიშნული ცვლილება დაინტერესებულ მხარეებს შესაძლებლობას მისცემს, როგორც დიზაინის მოქმედების ვადის განმავლობაში, ისე მისი ვადის გასვლის შემდეგაც, „საქპატენტთან“ არსებულ სააპელაციო პალატაში მოითხოვონ დიზაინის თაობაზე გარკვეული უფლებების დაცვა ან დაცული სფეროს კიდევ ერთხელ გადამოწმება.
კანონპროექტი აფართოებს დიზაინის ბათილად ცნობის საფუძვლებს. კერძოდ, შესაძლებელი იქნება დიზაინის ბათილად ცნობა იმ შემთხვევაშიც, თუ დიზაინის დაცვის ვადა გასულია ან რეგისტრაცია გაუქმებულია. ასევე, მოწესრიგებული იქნება დიზაინის ბათილად ცნობის უკუძალის შედეგები.
კიდევ ერთი ცვლილების თანახმად, დიზაინის რეგისტრაციის თაობაზე არსობრივი ექსპერტიზის გადაწყვეტილების ბათილად ცნობის შემთხვევაში, შესაძლებელი გახდება დიზაინის რეგისტრაცია შეცვლილი ფორმით, თუ ცვლილების შემდეგ აღნიშნული დიზაინი დააკმაყოფილებს დაცვისუნარიანობის კრიტერიუმებს და შენარჩუნებული იქნება თავდაპირველი დიზაინის არსი.
„დიზაინის შესახებ“ კანონში ცვლილების შეტანის შემდეგ, საქართველოს ინტელექტუალური საკუთრების კანონმდებლობა უკვე საბოლოოდ დაუახლოვდება ევროპული ინტელექტუალური საკუთრების კანონმდებლობას“, - აღნიშნა ვახტანგ ბაჩიაშვილმა.
