დავით სონღულაშვილი აზერბაიჯანის ეკონომიკის მინისტრს და ეკონომიკის კომიტეტის თავმჯდომარეს შეხვდა
საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი საპარლამენტო დელეგაციის წევრებთან ერთად, აზერბაიჯანის ეკონომიკის მინისტრს მიქაილ ჯაბაროვს და მილი მეჯლისის ეკონომიკის კომიტეტის თავმჯდომარე თაჰირ მირკიშილის შეხვდა.
„შეხვედრების ფარგლებში, საქართველოსა და აზერბაიჯანის რესპუბლიკას შორის არსებული ორმხრივი ურთიერთობები და ჩვენს საკანონმდებლო ორგანოებს შორის თანამშრომლობის გაღრმავების პერსპექტივები განვიხილეთ. ვისაუბრეთ შუა დერეფნის მნიშვნელობაზე, გაზრდილი ტვირთების ტრანსპორტირების ფონზე და მზაობა გამოვხატეთ ხელი შევუწყოთ აღნიშნული დერეფნის ეფექტიანად ფუნქციონირებას. აღსანიშნავია, რომ ჩვენი სტრატეგიული მდებარეობით, საშუალება გვაქვს მნიშვნელოვანი ეკონომიკური რეგიონების დასაკავშირებლად, დაინტერესებულ მხარეებს შევთავაზოთ გლობალურ ბაზრებთან დაკავშირება,“ - განაცხადა დავით სონღულაშვილმა.
აზერბაიჯანის მილი მეჯლისის ეკონომიკის კომიტეტის თავმჯდომარე თაჰირ მირკიშილმა ორ ქვეყანას შორის არსებული მტკიცე მეგობრობისა და სამომავლო პროექტების შესახებ ისაუბრა.
„შეხვედრაზე ხაზი გაესვა, რომ აზერბაიჯანი და საქართველო მეგობრული, მოძმე ქვეყნები არიან და ჩვენს ერებს შორის ურთიერთობები მუდმივად ვითარდება. ვისაუბრეთ, აზერბაიჯანისა და საქართველოს მიერ ერთად განხორციელებული ეკონომიკური პროექტების განხორციელებისა და ეკონომიკური განვითარებისთვის თანამშრომლობის გაძლიერების მნიშვნელობაზე,” - აღნიშნა მილი მეჯლისის ეკონომიკის კომიტეტის თავმჯდომარე თაჰირ მირკიშილმა.
დელეგაციის შემადგენლობაში შედიან: გელა სამხარაული, ბეჟან წაქაძე, ირაკლი ზარქუა და გიორგი ხახუბია.
შეხვედრებს ესწრებოდა აზერბაიჯანში საქართველოს ელჩი ზურაბ პატარაძე.
