საქართველოს პარლამენტის წევრმა, საქართველო-უნგრეთის საპარლამენტო მეგობრობის ჯგუფის თავმჯდომარემ, გიორგი ხატიძემ საპარლამენტთაშორისო კავშირის რეგიონულ სემინარში - „მდგრადი განვითარების მიზნები“ მიიღო მონაწილეობა. სემინარში, რომელიც ბუდაპეშტში 23-24 თებერვალს გაიმართა, მონაწილეობდნენ ცენტრალური და აღმოსავლეთ ევროპის და ცენტრალური აზიის ქვეყნების პარლამენტის წევრები.

სემინარის მონაწილეებმა მდგრადი განვითარების გლობალური გამოწვევები განიხილეს და ამ მიმართულებით შემდგომი ნაბიჯების შესახებ იმსჯელეს. გიორგი ხატიძემ სიტყვით მიმართა მონაწილეებს და მდგრადი განვითარების კუთხით საქართველოში განხორციელებული და მიმდინარე საკანონმდებლო და სხვა სიახლეები გააცნო.

რეგიონული სემინარის ფარგლებში შეხვედრები გაიმართა უნგრეთის პარლამენტის წევრებთან, საპარლამენტთაშორისო კავშირის პრეზიდენტთან და საგარეო ურთიერთობათა კომიტეტის თავმჯდომარის მოადგილესთან. გიორგი ხატიძე, ასევე, საპარლამენტთაშორისო კავშირის ვიცეპრეზიდენტს და უნგრეთ-საქართველოს საპარლამენტო მეგობრობის ჯგუფის თავმჯდომარეს შეხვდა.

ორმხრივ შეხვედრებზე მხარეებმა საქართველოს მეცხრე მოწვევის პარლამენტსა და უნგრეთის პარლამენტს შორის ურთიერთთანამშრომლობის საკითხები განიხილეს. უნგრელმა კოლეგებმა ხაზი გაუსვეს საქართველოში დემოკრატიული რეფორმების წარმატებით მიმდინარეობას. გიორგი ხატიძემ მადლობა გადაუხადა უნგრელ კოლეგებს თანამშრომლობისა და საქართველოს აქტიური მხარდაჭერისათვის.

შეხვედრებს საქართველოს საგანგებო და სრულუფლებიანი ელჩი უნგრეთში, ზაზა კანდელაკი ესწრებოდა.