ფრაქცია „ქართული ოცნების“ თავმჯდომარის პირველი მოადგილე და თურქმენეთის პარლამენტთან მეგობრობის ჯგუფის წევრი გიორგი ცაგარეიშვილი თურქმენეთის საპარლამენტო დელეგაციას შეხვდა.

შეხვედრაზე ყურადღება გამახვილდა საქართველოსა და თურქმენეთს შორის არსებულ თანამშრომლობაზე, მათ შორის, ტურიზმსა და სავაჭრო-ეკონომიკურ ურთიერთობებზე.

„თურქმენეთის რესპუბლიკა ერთ-ერთი პირველი იყო, ვინც თავის დროზე აღიარა საქართველოს დამოუკიდებლობა და დღეს ჩვენ შორის მეგობრული, პარტნიორული ურთიერთობა ჩამოყალიბდა. მნიშვნელოვანია, რომ ამ ბოლო დროს განსაკუთრებით ინტენსიური გახდა საპარლამენტთაშორისო დონეზე ურთიერთობა. ორი კვირის წინ საქართველოს პარლამენტის თავმჯდომარის ხელმძღვანელობით შედგა მაღალი დონის ვიზიტი თურქმენეთში, რასაც წინ უძღოდა ასევე საქართველოს პარლამენტის მეგობრობის ჯგუფის ვიზიტი. ეს ყველაფერი ცხადყოფს, რომ ურთიერთობები ინტენსიურია, ნაყოფიერია და ასეც გაგრძელდება. საერთაშორისო ვითარების გათვალისწინებით, თურქმენეთთან ურთიერთობის გაღრმავება და ყველა იმ საშუალების, მათ შორის, „შუა დერეფნად“ წოდებული ტრანსკავკასიური სატრანსპორტო დერეფნის გამოყენება, აუცილებელია“, - განაცხადა გიორგი ცაგარეიშვილმა.