პარლამენტის კვლევითი ცენტრის საქმიანობის დახვეწასთან დაკავშირებით განათლების, მეცნიერებისა და კულტურის კომიტეტის თავმჯდომარე გუგული მაღრაძე ევროკავშირისა და გაეროს განვითარების პროგრამის (UNDP) მოწვეული ექსპერტს მოირა ფრეიზერს შეხვდა, რომელიც პარლამენტის კვლევითი ცენტრის შესაძლებლობების განვითარების მიმართულებით იმუშავებს.

გუგული მაღრაძის ინფორმაციით, ქალბატონ მოირას აქვს დიდი გამოცდილება კვლევითი, საინფორმაციო და საბიბლიოთეკო სერვისების განვითარების მიმართულებით სხვადასხვა ქვეყნის პარლამენტებში, მათ შრის ახალ ზელანდიასა და მეანმარში. „მას უმუშავია ძალიან ბევრ ორგანიზაციაში, სხვადასხვა ქვეყნების პარლამენტებში, ჩაუტარებია კვლევები და ტრენინგები, თუ როგორ უნდა განახორციელოს პარლამენტმა ზედამხედველობა. იგი დაინტერესდა, თუ როგორ ახორციელებს საქართველოს პარლამენტი საზედამხედველო ფუნქციას“, - განაცხადა გუგული მაღრაძემ.
 
დეპუტატმა სტუმარს პარლამენტის ახალი რეგლამენტით გათვალისწინებულ მექანიზმები და ინსტრუმენტები გააცნო, რომელთა საშუალებითაც საპარლამენტო ზედამხედველობა ხორციელდება. „ეს არის მინისტრის საათი, ინტერპელაცია, აღმასრულებელი ხელისუფლების სხვადასხვა უწყებათა ანგარიშები“, - აღნიშნა გუგული მაღრაძემ. 

სტუმარი დაინტერესდა, თუ რა დახმარება შეიძლება გაუწიოს კვლევითმა ცენტრმა სქართველოს პარლამენტს. გუგული მაღრაძის მოსაზრებით, პარლამენტარს შეიძლება დასჭირდეს კვლევის წარმოება რამდენიმე მიმართულებით, მათ შორის იმისთვის, თუ რამდენად საჭიროა ამა თუ იმ საკანონმდებლო ინიციატივის მომზადება და მიღება. 

„ამას ორი მხარე აქვს. ერთი ის, რომ შესაძლებელია პრობლემები იყოს, მაგრამ ამ პრობლემების გადაჭრა ვერ ხდებოდეს იმიტომ, რომ თვითონ კანონმდებლობა არ არის შესატყვისი, მეორე - შეიძლება კანონმდებლობა ძალიან კარგი იყოს, მაგრამ არ არსებობდეს მისი აღსრულების მექანიზმები. გარდა ამისა, კვლევები შეიძლება წარმოებდეს შემოსული წერილების მიხედვით, თუ რა პრობლემები აწუხებს ხალხს, რომ პარლამენტარმა იმუშაოს ამ მიმართულებით საკანონმდებლო ინიციატივაზე. ამისთვის პარლამენტარი მარტო საკუთარ შთაბეჭდილებას ვერ დაეყრდნობა. იგი თხოვს კვლევის ცენტრს, რომ აწარმოოს საჭიროებების კვლევა და ამ საჭიროებების მიხედვით განსაზღვროს, სჭირდება ამას ახალი კანონმდებლობა თუ არ სჭირდება. მნიშვნელოვანია ისიც, რომ საპარლამენტო კვლევის დროს დეპუტატს ხელი სწრაფად უნდა მიუწვდებოდეს, რომ ზუსტი მსჯელობის მიზნით გადაამოწმოს ის ციფრები, რომელ ციფრებსაც, მაგალითად, პოლემიკისას ამა თუ იმ მიმართულებით ოპონენტი წარმოადგენს სხდომაზე“, - განაცხადა გუგული მაღრაძემ.