საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარემ, მარიამ ლაშხმა სასკოლო კონკურსის „როცა აფხაზეთში დავბრუნდები“ გამარჯვებული მოსწავლეების დაჯილდოების ცერემონიაში მიიღო მონაწილეობა.

ღონისძიებაზე სიტყვით გამოსვლისას მარიამ ლაშხმა კონკურსის მნიშვნელობაზე ისაუბრა და აღნიშნა, რომ ახალგაზრდების ნამუშევრები სამშობლოს სიყვარულის, მშვიდობის და უკეთესი მომავლის რწმენის გამოხატულებაა.

„განსაკუთრებით მნიშვნელოვანია, რომ აფხაზეთზე ფიქრისას თქვენ საუბრობთ დაბრუნებაზე, შეხვედრაზე, ურთიერთგაგებასა და საერთო მომავალზე. ეს არის მიზანი, რომელიც გვახსენებს, რომ აფხაზეთი ჩვენი საერთო ისტორიის, კულტურისა და იდენტობის განუყოფელი ნაწილია, ხოლო მშვიდობა და შერიგება არის გზა, რომელიც მომავალ თაობებს ერთმანეთთან კიდევ უფრო დააახლოებს“, - განაცხადა მარიამ ლაშხმა.

ღონისძიების მონაწილეებს სიტყვით ასევე მიმართეს: განათლების, მეცნიერებისა და ახალგაზრდობის მინისტრმა გივი მიქანაძემ, შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა, აფხაზეთის ავტონომიური რესპუბლიკის მთავრობის თავმჯდომარემ, გიორგი ჯინჭარაძემ და საპატრიარქოს საზოგადოებასთან ურთიერთობის სამსახურის ხელმძღვანელის მოადგილემ, დეკანოზმა გურამ ჭარელაშვილმა.

კონკურსში მონაწილეობა 400-მდე საჯარო და კერძო სკოლის 2500-ზე მეტმა მოსწავლემ მიიღო, რომლებმაც ჯამში 1270 ნაშრომი წარადგინეს. კონკურსის ფარგლებში, მონაწილეებმა სხვადასხვა შემოქმედებითი პროექტი შექმნეს.