პარლამენტის განათლების, მეცნიერების და კულტურის კომიტეტის თავმჯდომარის მოადგილე გუგული მაღრაძე ზურაბ ჟვანიას სახელობის სახელმწიფო ადმინისტრირების სკოლის საქმიანობის ანგარიშის წარდგენის ღონისძიებაში მონაწილეობდა.

შეხვედრაზე ზურაბ ჟვანიას სახელობის სახელმწიფო ადმინისტრირების სკოლის მუშაობის ანგარიში სკოლის დირექტორმა, ქეთი ჯაყელმა წარადგინა. 

გუგული მაღრაძემ გამოსვლაში ხაზი გაუსვა ჟვანიას სახელობის სახელმწიფო ადმინისტრირების სკოლის დიდ მნიშვნელობას საჯარო სამსახურების მუშაკთა კვალიფიკაციის ამაღლების საქმეში. მან აღნიშნა, რომ ქვეყნის განვითარება უპირველესად დამოკიდებულია საჯარო მართვაში ჩაბმულ კადრების მომზადების დონეზე. 

„ესენი არიან ადამიანები, რომლებიც ადგილებზე ახორციელებენ ქვეყნის განვითარების სტრატეგიებს. რაც არ უნდა ბრწყინვალე ცენტრალური მთავრობა ჰყავდეს ქვეყანას, თუ ადგილებზე არ არიან პროფესიონალი და მოტივირებული სპეციალისტები, მას გაუჭირდება სწრაფი განვითარება“, - აღნიშნა გუგული მაღრაძემ. მისი თქმით, ამ სკოლის ღირშესანიშნაობაა ის, რომ სკოლის მესვეურები ძალიან სწრაფად და ეფექტურად ახდენენ ქვეყანაში მართვის სფეროში წამოჭრილი გამოწვევების იდენტიფიკაციას და თავისი კომპეტენციის ფარგლებში ეფექტურად და ხარისხიანად მუშაობენ, ამ გამოწვევების საპასუხოდ კვალიფიციური ადამიანური რესურსით უზრუნველყოფენ საჯარო მართვის სხვადსხვა სფეროს. 

გუგული მაღრაძემ მადლობა გადაუხადა სკოლის ხელმძღვანელობას საუკეთესო მუშაობისათვის და პარლამენტის სახელით სრული მხარდაჭერა გამოუცხადა ქვეყნისთვის საჭირო საქმიანობის განხორციელებაში. 

შეხვედრის დასასრულს გაფორმდა ურთიერთთანამშრომლობის მემორანდუმი ზურაბ ჟვანიას სახელობის სახელმწიფო ადმინისტრირების სკოლასა და პოლონეთის საჯარო სამსახურის სკოლას შორის. ზურაბ ჟვანიას სახელობის სახელმწიფო ადმინისტრირების სკოლის დაფუძნებიდან 15 წელი გავიდა. იგი მნიშვნელოვან საქმიანობას ეწევა სახელმწიფო ადმინისტრირების სფეროს განვითარების მიმართულებით.
 
ზურაბ ჟვანიას სახელობის სახელმწიფო ადმინისტრირების სკოლის მთავარი მიმართულებაა სასწავლო და პრაქტიკული პროგრამების განხორციელების გზით ქვეყნის სახელმწიფო და ადგილობრივი თვითმმართველობის სფეროში არსებული საკადრო დეფიციტის დაძლევა და მაღალმთიან და ეროვნული უმცირესობებით დასახლებულ რეგიონებში მცხოვრები ადგილობრივი მოსახლეობის ერთიან სახელმწიფოებრივ სივრცეში ინტეგრაციისთვის ხელისშეწყობა. ასევე სახელმწიფო და ადგილობრივი თვითმმართველობის ორგანოებში დასაქმებულ პირთა კვალიფიკაციის და პროფესიონალიზმის დონის ამაღლების უზრუნველყოფა და ეროვნული უმცირესობებით კომპაქტურად დასახლებულ რეგიონებში მცხოვრებ მოქალაქეთა მიერ სახელმწიფო ენის ფლობის და სამოქალაქო განათლების დონის ამაღლება. გარდა სახელმწოფო ენის სწავლების და საჯარო მოხელეთა გადამზადების პროგრამებისა, სკოლამ ასევე განავითარა ახალი პროგრამები: კომპიუტერული ტექნოლოგიების შემსწავლელი საბაზისო პროგრამები, საქართველოს საჯარო სკოლების ოპერირება და მოვლა-პატრონობის პროგრამა და სკოლამდელი აღზრდის მართვის საფუძვლების პროგრამა. სკოლის მიერ მომზადებულია სახელმძღვანელოები არაქართველი მოსახლეობისათვის ქართული ენის სწავლებაში, ასევე მომზადებულია გაიდლაინები და სახელმძღვანელოები სხვა პროგრამების სათანადო რესურსებით უზრუნველყოფისათვის. გასულ წელს ასევე მომზადდა ონლაინ კურსები ქართული ენის სწავლებისათვის. 

ზურაბ ჟვანიას სახელობის სახელმწიფო ადმინისტრირების სკოლა მემორანდუმების საფუძველზე ახორციელებს ერთობლივ პროგრამებს, თავდაცვის სამინისტროს, შერიგების და ინტეგრაციის სამინისტროს და სხვა ორგანიზაციებთან. ზურაბ ჟვანიას სახელობის სახელმწიფო ადმინისტრირების სკოლა თავისი საქმიანობის ეფექტიანი და თანამედროვე მიდგომების დანერგვისათვის თანამშრომლობს საერთაშორისო პარტნიორებთან, რაც ხელს შეუწყობს სკოლის პროგრამების ხარისხის გაუმჯობესებას, მისი ცნობადობის გაზრდას და კვალიფიციური გამოცდილების გაზიარებას საჯარო სექტორში დასაქმებული და ყველა დაინტერესებული მხარისათვის. ამ მიზნით დაწყებული საერთაშორისო თანამშრომლობა წარმატებით გრძელდება. სკოლა ინტერნალიზაციის ფარგლებში გეგმავს თანამშრომლობას ევროკავშირის ქვეყნებთან, უკვე გაფორმდა მემორანდუმი პოლონეთთან და იგეგმება თანამშრომლობა დიდი ბრიტანეთის, ისრაელის, სამხრეთ კორეის შესაბამის ინსტიტუციებთან.