თავდაცვისა და უშიშროების კომიტეტის თავმჯდომარე ირაკლი სესიაშვილი და თავმჯდომარის მოადგილეები: ირაკლი ბერაია, ირაკლი აბესაძე და კობა კობალაძე აშშ-ის კონგრესის დელეგაციის წევრებს შეხვდნენ.

როგორც ირაკლი სესიაშვილმა განაცხადა, ამერიკის შეერთებული შტატები არის საქართველოს გამორჩეული სტრატეგიული პარტნიორი და ლოკომოტივი ქვეყანა სქართველოს ევროატლანტიკური ინტეგრაციის პროცესში.

„ჩვენ გვაქვს სრული პოლიტიკური თანხვედრა ზოგადად რეგიონში და ჩვენს ქვეყანაში მშვიდობისა და უსაფრთხოების თვალსაზრისით, სტაბილურობის თვალსაზრისით. მადლობელი ვართ როგორც პოლიტიკური, ასევე პრაქტიკული მხარდაჭერისთვის თავდაცვისა და უსაფრთხოების სფეროში. ყოველდღიურ რეჟიმში ამერიკის შეერთებული შტატების წარმომადგენლები, ექსპერტები ჩართული არიან ჩვენი ქვეყნის თავდაცვის აღმშენებლობის პროცესში, ამასთანავე, ვიღებთ ფინანსურ მხარდაჭერასაც“, - განაცხადა კომიტეტის თავმჯდომარემ.

მისი ინფორმაციით, სამხედრო აღჭურვილობის შეძენა, რომელიც ჩვენი ქვეყნის თავდაცვისუნარიანობის ზრდას განაპირობებს, სწორედ ამერიკის შეერთებული შტატების მხარდაჭერით იქნა მიღწეული.

„მხედველობაში მაქვს ტანკსაწინააღმდეგო სისტემების შეძენა. ჩვენ ვმუშაობთ ჰაერსაწინააღმდეგო სისტემების შეძენაზე, ჩვენი ჯარისკაცების მომზადებაზე. ჩვენ გვაქვს საბრძოლო მზადყოფნის პროგრამა, რომლის ფარგლებშიც ამერიკელები გვეხმარებიან, რომ მოვამზადოთ 24 000 სამხედრო მოსამსახურე ჩვენი ქვეყნის თავდაცვის პროგრამით“, - აღნიშნა ირაკლი სესიაშვილმა.

თუმცა მისი თქმით, მთავარი მაინც არის ის სრული პოლიტიკური მხარდაჭერა, რომელიც ბოლო წლებში თვალსაჩინო და მკაფიოა ამერიკის შეერთებული შტატების მხრიდან საქართველოს მიმართ. „მოლოდინები გვაქვს, რომ ეს პარტნიორობა მომავალში კიდევ უფრო გაღრმავდება“, - განაცხადა კომიტეტის თავმჯდომარემ.