კახაბერ ოქრიაშვილი, სიმონ ნოზაძე და რამაზ ნიკოლაიშვილი ყაზახეთში საპრეზიდენტო არჩევნებზე დამკვირვებლის სტატუსით იმყოფებოდნენ
პარლამენტის წევრის, კახაბერ ოქრიაშვილის ხელმძღვანელობით, ყაზახეთში საქართველოდან სადამკვირვებლო დელეგაცია გაემგზავრა.
საქართველო-ყაზახეთის საპარლამენტო მეგობრობის ჯგუფის თავმჯდომარის, კახაბერ ოქრიაშვილის გარდა, ყაზახეთში დაგეგმილ საპრეზიდენტო არჩევნებს ამავე ჯგუფის წევრები, სიმონ ნოზაძე და რამაზ ნიკოლაიშვილიც აკვირდებოდნენ.
ქართული დელეგაციის წარმომადგენლებმა სპეციალური ბრიფინგის მეშვეობით, ყაზახურ მედიას არჩევნების მიმდინარეობაზე საკუთარი შეფასებებიც გაუზიარეს.
„საქართველოდან სამი დამკვირვებელი ვართ. დილიდან შევუდექით საკუთარი მოვალეობების შესრულებას და მთელი საარჩევნო დღის განმავლობაში, არ დაგვიფიქსირებია არცერთი კანონდარღვევა. ვფიქრობთ, ამომრჩევლისთვის ყველანაირი პირობა იყო შექმნილი, რომ მათ საკუთარი პოზიცია დემოკრატიულ ვითარებაში დაეფიქსირებინათ. მთლიანობაში, ჩვენ გვქონდა შესაძლებლობა, დავკირვებოდით და გავცნობოდით ნებისმიერი ოლქის მუშაობას. ჩვენ გაგვაოცა ამომრჩევლის აქტიურობამ, რადგან თავად გავხდით იმის მომსწრე, როგორ იდგა ერთ-ერთ საარჩევნო უბანთან ამომრჩეველთა გრძელი რიგი,“ - განაცხადა კახაბერ ოქრიაშვილმა ყაზახურ მედიასთან საუბრისას.
