პოლიტიკური ჯგუფის „მოქალაქეები“ წევრი ქეთევან თურაზაშვილი ეუთო-ს დემოკრატიული ინსტიტუტებისა და ადამიანის უფლებათა ოფისის (ODIHR) საჭიროების შემფასებელი მისიის წარმომადგენლებს შეხვდა.

შეხვედრაზე მხარეებმა ქვეყანაში არსებულ წინასაარჩევნო გარემოსა და მასთან დაკავშირებულ საკითხებზე ისაუბრეს.

„შეხვედრაზე ყველა იმ საკითხს შევეხეთ, რომელიც უმნიშვნელოვანესია არჩევნების დემოკრატიულ პირობებში ჩატარებისთვის. ვისაუბრეთ იმაზეც, რომ საერთაშორისო დამკვირვებლების ყოფნა არჩევნებზე არის გადამწყვეტი და უმნიშვნელოვანესი იმისთვის, რომ „ქართულ ოცნებას“ არჩევნების რაიმე ფორმით გაყალბების საშუალება არ ჰქონდეს“, - განაცხადა ქეთევან თურაზაშვილმა შეხვედრის შემდეგ.
​

როგორც მან აღნიშნა, პარტნიორებისგან მიიღეს დაპირება, რომ სრულად იქნებიან ჩართული მთელ ამ პროცესში და დააკვირდებიან ყველა დეტალს, თუ როგორ ჩატარდება არჩევნები საქართველოში.