პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი, თავმჯდომარის პირველი მოადგილე გიორგი ჩაკვეტაძე და ფრაქცია „ქართული ოცნების“ თავმჯდომარის მოადგილე ირმა ზავრადაშვილი თბილისის 169-ე საჯარო სკოლას ეწვივნენ.

პარლამენტის წევრებმა ახლად რეაბილიტირებული სკოლის შენობა დაათვალიერეს, მოსწავლეებსა და მასწავლებლებს შეხვდნენ და ახალი სასწავლო წლის დაწყება მიულოცეს.

„ახალი სასწავლო წლის დაწყებას ვულოცავ მოსწავლეებს, მშობლებს, პედაგოგებსა და ადმინისტრაციას. სკოლაში შექმნილია ისეთი გარემო, რომ მოსწავლემ იფიქროს სწავლაზე, განვითარებაზე და არა მხოლოდ ცოდნა მიღოს, არამედ ქვეყნისთვის სასიკეთო მოქალაქედ ჩამოყალიბდეს“, - განაცხადა მარიამ ლაშხმა.

ასევე, დეპუტატებმა 169-ე სკოლის წარჩინებულ კურსდამთავრებულებს ოქროსა და ვერცხლის მედლები გადასცეს.

„სკოლის არაერთი წარმატებული კურსდამთავრებული ჰყავს. ზოგიერთი მათგანი სწავლას უმაღლეს სასწავლებელში, ზოგი კი პროფესიული განათლების მიმართულებით აგრძელებს. თითოეულ მათგანს ვუსურვებ წარმატებებს და მიზნების მიღწევას“, - განაცხადა გიორგი ჩაკვეტაძემ.


სასკოლო საზოგადოებას სწავლის დაწყება მიულოცა ფრაქცია „ქართული ოცნების“ თავმჯდომარის მოადგილემ ირმა ზავრადაშვილმა.

„169-ე სკოლა ერთ-ერთი წარმატებული სკოლაა არა მხოლოდ მედალოსნების ნაწილში, არამედ სპორტის მიმართულებითაც. აღსანიშნავია, რომ სწორედ ამ სკოლაში ხვიჩა კვარაცხელია სწავლობდა. დარწმუნებული ვარ, რომ ეს სკოლა კიდევ არაერთ წარმატებულ ადამიანს აღზრდის“, - აღნიშნა ირმა ზავრადაშვილმა.