დეზინფორმაციისა და რუსული პროპაგანდის მიმართულებით არსებული საერთო გამოწვევები, მისი გამკლავების გზები და ამ კუთხით ურთიერთგამოცდილების გაზიარება იყო საგარეო ურთიერთობათა კომიტეტის თავმჯდომარის პირველი მოადგილისა და ლიეტუვას სეიმის წევრების შეხვედრის მთავარი თემა.

დიმიტრი ცქიტიშვილმა კოლეგებს, საგარეო ურთიერთობათა კომიტეტის დეზინფორმაციისა და პროპაგანდის საკითხებთან დაკავშირებით შექმნილი თემატური მოკვლევის ჯგუფის მიერ მოპოვებული ინფორმაცია გააცნო.

თავის მხრივ, სტუმრებმა ამ მიმართულებით თავიანთი ქვეყნის გამოცდილებაზე ისაუბრეს.

„გამოწვევა ორივე ქვეყნისთვის მსგავსია. რუსეთის დეზინფორმაცია არის მთავარი საფრთხე ჩვენი ქვეყნებისთვის და ამ მიმართულებით, ჩვენი თანამშრომლობა იქნება ნაყოფიერი. მნიშვნელოვანია, რომ ჩვენ ერთმანეთს გავუზიაროთ გამოცდილება, დავინახოთ ის ხედვები და მეთოდები, რაც მათ ამ მიმართულებით გამოიყენეს, რამ იმუშავა და რამ არ იმუშავა, როგორ ვითარდება დეზინფორმაციის პროცესი და ინსტრუმენტები და როგორ უნდა შევხვდეთ ამ გამოწვევებს. შეხვედრისას ვისაუბრეთ იმაზეც, თუ როგორ შეიძლება სახელმწიფო ებრძოლოს რუსულ პროპაგანდას და დეზინფორმაციას ისე, რომ არ შეიზღუდოს სიტყვისა და გამოხატვის თავისუფლება, როგორ უნდა მოხდეს ძალიან ფრთხილი ჩარევები, რა ინსტრუმენტები შეიძლება დადგინდეს და როგორ უნდა მოხდეს ამ ინსტრუმენტებისა და ზოგადად, რუსეთის მიერ წარმოებული პროპაგანდის განეიტრალება“, - განაცხადა დიმიტრი ცქიტიშვილმა.