პარლამენტმა, პირველი მოსმენით, დაჩქარებული წესით განიხილა და 83 ხმით, 12-ის წინააღმდეგ მხარი დაუჭირა „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ კანონში ცვლილებას.

კანონპროექტი ითვალისწინებს საქართველოს მთავრობის შემადგენლობაში სამართალდამცავი ორგანოების კოორდინაციის საკითხებში საქართველოს სახელმწიფო მინისტრის თანამდებობის შემოღებას.

როგორც მომხსენებელმა, საქართველოს მთვარობის საპარლამენტო მდივანმა ვახტანგ ბაჩიაშვილმა განაცხადა, სამართალდამცავი ორგანოების საქმიანობა და მათი კოორდინაცია საქართველოს მთავრობის კონსტიტუციურ უფლებამოსილებას წარმოადგენს და ის ამავდროულად გათვალისწინებულია სამთავრობო პროგრამაში.

„სამართალდამცავი ორგანოების საქმიანობა უზრუნველყოფს ქვეყნის სტაბილურ და მდგარად განვითარებას და მნიშვნელოვანია ზოგადად, ქვეყნის წინაშე არსებული უამრავი გამოწვევის გადასაჭრელად. ბოლო პერიოდში, ქვეყანაში განხორციელებული საკადრო ცვლილებების შედეგად გააქტიურებულია სამართალდამცავი ორგანოების საქმიანობა, რომელიც დღესდღეობით ხორციელდება როგორც მთავრობის შემადგენლობაში შემავალი შინაგან საქმეთა სამინისტროს მეშვეობით, ასევე ისეთი სპეციალური დანიშნულების სახელმწიფო დაწესებულებების მეშვეობით, როგორიცაა - სახელმწიფო უსაფრთხოების სამსახური და სახელმწიფო დაცვის სპეციალური სამსახური. აღმასრულებელ ხელისუფლებაში მსგავსი საკოორდინაციო მექანიზმის შემოღება აამაღლებს და კიდევ უფრო ეფექტურს გახდის სამართალდაცვითი ორგანოების საქმიანობას. ამავდროულად, სახელმწიფო მინისტრის უფლებამოსილების ფარგლებში იქნება ამ მიმართულებით თანამშრომლობა ისეთ კონსტიტუციურ ორგანოებთან როგორიცაა: სახელმწიფო აუდიტის სამსახური, პროკურატურის სისტემა და საქართველოს სასამართლო ხელისუფლება“, - აღნიშნა ვახტანგ ბაჩიაშვილმა.