პარლამენტმა მესამე მოსმენით განიხილა „საქართველოს სივრცის დაგეგმარების, არქიტექტურული და სამშენებლო საქმიანობის კოდექსში ცვლილების შეტანის შესახებ“ კანონპროექტი და 81 ხმით მხარი დაუჭირა.

საკითხი პლენარულ სხდომაზე კანონპროექტის ერთ-ერთმა ინიციატორმა, ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა წარადგინა.

კანონპროექტით განისაზღვრება ქალაქ თბილისის მუნიციპალიტეტის ადმინისტრაციულ საზღვრებში კულტურული მემკვიდრეობის ობიექტებსა და დამცავ ზონებში განხორციელებულ ცალკეულ სამშენებლო სამუშაოებთან დაკავშირებული რეგულაციები.

მოქმედი რედაქციით, თუ ქალაქ თბილისის მუნიციპალიტეტის ადმინისტრაციულ საზღვრებში არსებულ კულტურული მემკვიდრეობის დამცავ ზონაში მშენებლობის განხორციელების ან კულტურული მემკვიდრეობის უძრავ ძეგლზე სამუშაოების განხორციელების შემთხვევაში, მშენებლობის ნებართვის მოქმედების ვადა გავიდა და მშენებლობა/რეაბილიტაცია დამთავრებული არ არის ან განხორციელებულია უნებართვო მშენებლობა, მშენებლობის საჯარო ზედამხედველობის განმახორციელებელი ადმინისტრაციული ორგანო დამრღვევს 90-დღიან ვადას განუსაზღვრავს სათანადო თანხმობის/ნებართვის მისაღებად ან ამ დარღვევის გამოსასწორებლად.

ცვლილებებით ზუსტდება, რომ კოდექსით გათვალისწინებული სპეციალური წესი გავრცელდება კულტურული მემკვიდრეობის უძრავ ძეგლზე განხორციელებულ კვლევით და სარეაბილიტაციო სამუშაოებზე, ასევე კულტურული მემკვიდრეობის დამცავ ზონაში განხორციელებულ I კლასის სამუშაოებსა და უნებართვო მშენებლობაზე მხოლოდ იმ შემთხვევაში, თუ ახალი შენობის ფართობი ან არსებული შენობის ნამატი ფართობი 10 კვადრატულ მეტრს არ აღემატება.

ამასთან, დგინდება გამონაკლისი, რომლის მიხედვით, აღნიშნული შეზღუდვა არ გავრცელდება ავარიული შენობა-ნაგებობების ჩანაცვლების ან/და ქალაქთმშენებლობითი ღონისძიების ფარგლებში განხორციელებულ მშენებლობაზე, თუ მას ახორციელებს ქალაქ თბილისის მუნიციპალიტეტის მერია ან მუნიციპალიტეტის მიერ დაფუძნებული იურიდიული პირი.