პარლამენტმა „ვაზისა და ღვინის შესახებ“ კანონში ცვლილება გამარტივებული წესით, 81 ხმით მიიღო.

ცვლილებით ხდება „ვაზისა და ღვინის შესახებ“ კანონის იმ ნორმის ამოქმედების გადავადება (ნორმა ამოქმედდება 2028 წლის 3 იანვრიდან, ნაცვლად 2024 წლის 1 იანვრიდან ამოქმედებისა), რომელიც ეხება ალკოჰოლიანი სასმლის ეტიკეტზე მითითებას - „ქართული ბრენდი“, თუ ბრენდის საწარმოებლად გამოყენებული სპირტის არანაკლებ 85%-ს შეადგენს საქართველოში მოყვანილი ყურძნისგან დამზადებული სპირტი.

მომხსენებლის, გარემოს დაცვისა და სოფლის მეურნეობის მინისტრის პირველი მოადგილის ნინო თანდილაშვილის განცხადებით, კანონის დღეს მოქმედი რედაქციით ბრენდის საწარმოებლად გამოყენებული სპირტის ოდენობა უნდა იყოს არანაკლებ 50%.

„აღნიშნულ საკითხთან დაკავშირებით ჩვენ არაერთი შეხვედრა გვქონდა კერძო სექტორის წარმომადგენლებთან, რომლებიც დღესდღეობით „ქართულ ბრენდს“ აწარმოებენ და გააქვთ ექსპორტზეც, მათ შორის ევროკავშირის ბაზარზე. ასეთი ნახტომისებური ზრდა შესაძლებელია მნიშვნელოვნად აისახოს პროდუქციის წარმოების ფასზე და სწორედ აქედან გამომდინარე, მნიშვნელოვანია, რომ პროცენტული ზრდა განხორციელდეს ეტაპობრივად. სწორედ ამ მიზნით შემოთავაზებულია, რომ გადავადდეს ამ მუხლის მოქმედება და შემდგომი წლების განმავლობაში ნაცვლად პროცენტული მაჩვენებლის ასეთი ნახტომისებურ ზრდისა იყოს 5-10%-იანი ზრდა, რასაც სექტორი მოერგება და ეს საკითხები პრაქტიკაში უმტკივნეულოდ განხორციელდება“, - აღნიშნა ნინო თანდილაშვილმა.