საქართველოს პარლამენტის პლენარულ სხდომათა დარბაზის წინ გამოიფინა საქართველოს კონსტიტუციის ორიგინალი ეგზემპლარი, რომელსაც 1995 წლის 17 ოქტომბერს ხელი მოაწერეს საქართველოს პარლამენტისა და საკონსტიტუციო კომისიის წევრებმა.

საქართველოს პარლამენტის ზვიად გამსახურდიას სახელობის პლენარულ სხდომათა დარბაზში 1995 წლის 24 აგვისტოს მიღებული საქართველოს კონსტიტუციის ორიგინალი ვერსიის ზუსტი ასლები დარიგდა.

საქართველოს კონსტიტუციის ორიგინალი ვერსიის ზუსტი ასლები, პარლამენტის წევრებთან ერთად, საქართველოს პრემიერ-მინისტრის ყოველწლიური მოხსენების ფარგლებში პარლამენტში მოწვეულ სრულიად საქართველოს კათოლიკოს-პატრიარქს, მცხეთა-თბილისის მთავარეპისკოპოსს, ბიჭვინთისა და ცხუმ-აფხაზეთის მიტროპოლიტ შიო III-ს, აღმასრულებელი და სასამართლო ხელისუფლების წარმომადგენლებს, აჭარისა და აფხაზეთის ავტონომიური რესპუბლიკების ხელმძღვანელებს, თბილისის მერიისა და საკრებულოს წარმომადგენლებს, ასევე, მოწვეულ სტუმრებს საჩუქრად გადაეცათ.

„პარლამენტის პლენარულ სხდომათა დარბაზის წინ გამოფენილია 1995 წლის 24 აგვისტოს მიღებული საქართველოს კონსტიტუციის ორიგინალი, რომელზეც პარლამენტისა და საკონსტიტუციო კომისიის ყველა წევრის ხელმოწერაა. ეს ორიგინალი სახელმწიფო არქივში ინახება. ჩვენ ვთხოვეთ არქივს და გავაკეთეთ საქართველოს კონსტიტუციის ორიგინალის ზუსტი ასლი, რომელიც თქვენ დაგირიგდათ. ეს კონსტიტუცია ჩვენ სხვადასხვა თემას შეგვახსენებს. უპირველესად, შეგვახსენებს თავის შინაარსს და დღეს განსაკუთრებით ხაზგასასმელია კონსტიტუცია, რომელშიც საქართველოს ისტორიაში მართლმადიდებელი ეკლესიის განსაკუთრებული როლი აღინიშნა. კონსტიტუციაში ამ განსაკუთრებული როლის ხაზგასმას შემდეგ, 2002 წელს სახელმწიფოსა და ეკლესიას შორის კონკორდატის ხელმოწერა მოჰყვა. გარდა ამისა, კონსტიტუციის მიღება და ის პერიპეტიები, რომლებიც მის მიღებას უკავშირდებოდა, კერძოდ - 1995 წლის 25 აგვისტოს დაგეგმილი კონსტიტუციის ხელმოწერა, სახელმწიფო მეთაურზე მომხდარი ტერაქტის გამო ვერ შედგა. მაშინაც გარე ძალების ჩარევით, ქვეყნის შიგნით ხელების ფათურით და ადამიანების დაპირისპირების გარედან წაქეზებით გადაიდო კონსტიტუციაზე ხელმოწერა და შემდგომ, 1995 წლის 17 ოქტომბერს, ამ დარბაზში გაიმართა ხელმოწერის ცერემონია“, - განაცხადა პარლამენტის თავმჯდომარემ, შალვა პაპუაშვილმა.