საპარლამენტო ოპოზიციის წარმომადგენლები ევროპარლამენტარებს, საქართველო-ევროკავშირის ასოცირების საპარლამენტო კომიტეტის თავმჯდომარეს მარინა კალიურანდს და საქართველოს შესახებ მომხსენებელს, სვენ მიქსერს შეხვდნენ.

შეხვედრაზე საუბარი ევროკავშირის თორმეტპუნქტიანი რეკომენდაციის განხორციელების პროცესში ოპოზიციის ჩართულობას შეეხებოდა.

როგორც შეხვედრის შემდეგ ოპოზიციონერმა დეპუტატებმა აღნიშნეს, შეხვედრაზე ევროპარლამენტარების მხრიდან იყო მოწოდება საპარლამენტო ოპოზიციის მიმართ, რომ ისინი აუცილებლად უნდა ჩაერთონ სამუშაო ჯგუფებში, რადგან მნიშვნელობა აქვს არა მხოლოდ შედეგს, არამედ პროცესსაც, რომ ხელისუფლება და ოპოზიცია ერთად მუშაობდეს საკითხებზე, რომელიც შეეხება ეროვნულ ინტერესებს.

„ეს ადამიანები გვიმეორებენ ერთსა და იმავეს, - უნდა დასხდეთ და იმუშაოთ ერთად. ამას ევროპელი პარლამენტარები ამბობენ იმათ გასაგონად ვინც სამუშაო ჯგუფებში მონაწილეობაზე ამბობს უარს. მათ დღეს ასევე გაიხსენეს პარლამენტში შემოსვლის ამბები და თქვეს, რომ ეს იყო არასწორი გადაწყვეტილება, რადგან როდესაც შენი მოქალაქეების მანდატი გაქვს, უნდა იყო პარლამენტში“, - განაცხადა პარლამენტის ვიცე-სპიკერმა ლევან იოსელიანმა შეხვედრის დასრულების შემდეგ.