პარლამენტის განათლებისა და მეცნიერების კომიტეტის თავმჯდომარის პირველმა მოადგილემ, თამარ ტალიაშვილმა USAID სამართლის უზენაესობის პროგრამის მიერ ორგანიზებულ შეხვედრაში მიიღო მონაწილეობა. შეხვედრის თემატიკა იყო „იურიდიული განათლება საქართველოში: გამოწვევები და შესაძლებლობები“.

თამარ ტალიაშვილმა სიტყვით გამოსვლისას აქცენტი გააკეთა სამართლის, როგორც რეგულირებადი პროფესიის მნიშვნელობაზე, განათლებისა და მეცნიერების კომიტეტში მიმდინარე საგანმანათლებლო რეფორმის პრიორიტეტულ საკითხებსა და იურიდიული განათლების ინტერნაციონალიზაციაზე.

„მისასალმებელია იურიდიული განათლების ხარისხის განვითარების, ასევე სამართალმცოდნის პროფესიაში შესვლის გამოწვევების საკითხებზე დისკუსიაში პროფესიული წრეების, უნივერსიტეტებისა და პოტენციური დამსაქმებლების მონაწილეობა. მნიშვნელოვანია, იურიდიული განათლების ხარისხის გამოწვევები განხილულ იქნეს არა განყენებულად, არამედ განათლებისა და დასაქმების სისტემების ერთიან ჭრილში. განათლებისა და მეცნიერების კომიტეტი ჰოლისტურად უდგება ამ საკითხს და საპარლამენტო ჩართულობა ამ პროცესში აქტიურია,“ - განაცხადა თამარ ტალიაშვილმა.

დისკუსიაში მონაწილეობას იღებდნენ უმაღლესი საგანმანათლებლო ორგანიზაციების წარმომადგენლები, ექსპერტები და სხვადასხვა პროფესიული სფეროს წარმომადგენლები.

USAID სამართლის უზენაესობის პროგრამა საქართველოში, 5-წლიანი, 25 მილიონი აშშ დოლარის ღირებულების პროექტია, რომელსაც ამერიკის შეერთებული შტატების საერთაშორისო განვითარების სააგენტო (USAID) აფინანსებს. პროგრამას აღმოსავლეთ-დასავლეთის მართვის ინსტიტუტი(EWMI) ახორციელებს.