საქართველოს პარლამენტის თავმჯდომარე დავით უსუფაშვილი და საპარლამენტო დელეგაცია ოფიციალური ვიზიტით შვეიცარიის კონფედერაციაში, ქალაქ ბერნში იმყოფება. დელეგაციის შემადგენლობაში საგარეო ურთიერთობათა კომიტეტის თავმჯდომარე თედო ჯაფარიძე, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, შვეიცარიის კონფედერაციის პარლამენტთან მეგობრობის ჯგუფის ხელმძღვანელი ეკა ბესელია და ამავე ჯგუფის წევრი, საპარლამენტო უმცირესობის წევრი სერგო რატიანი შედიან.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, ეკა ბესელიას შეფასებით, შვეიცარია მნიშვნელოვან როლს ასრულებს საქართველოსა და რუსეთს შორის ურთიერთობაში. მისივე თქმით, საპარლამეტო დელეგაცის ვიზიტი ხელს შეუწყობს საქართველოსა და შვეიცარიას შორის ურთიერთობებში ახალი ეტაპის დაწყებას. ,,შვეიცარია ძალიან მნიშვნელოვანი ქვეყანაა, რომელიც უდიდეს და უმნიშვნელოვანეს როლს ასრულებს საქართველო-რუსეთს შორის ურთიერთობაში როგორც მედიატორი ქვეყანა. პარლამენტის თავმჯდომარის რანგში შვეიცარიაში ვიზიტი არ განხორციელებულა და ამიტომ, ამ ვიზიტს ძალიან დიდი მნიშვნელობა აქვს. ვფიქრობ, რომ მართლაც ძალიან მნიშვნელოვანი ეტაპი იწყება ჩვენს ქვეყნებს შორის ურთიერთობაში. განსაკუთრებით აღვნიშნავდი საქართველო - შვეიცარიის მეგობრობის ჯგუფებს შორის ურთიერთობის დაწყებასაც. საქართველოსთან მეგობრობის ჯგუფი შვეიცარიის პარლამენტში პირველად შეიქმნა და ამ პროცესში ძალიან დიდი როლი შეასრულა ჩვენმა საელჩომ და ელჩმა. უკვე შედგა საქართველოს პარლამენტთან მეგობრობის ჯგუფის ხელმძღვანელის, ფილიპო ლომბარდის ვიზიტი საქართველოში. ვფიქრობ, რომ ეს ურთიერთობები კიდევ უფრო აქტიური იქნება. ბევრი თემა და ბევრი საკითხია, რომელიც ორმხრივი ინტერესის საგანია და ერთობლივი მუშაობისთვის ძალიან საინტერესო იქნება. ჩვენ ვიმუშავებთ მეგობრობის ჯგუფების ფორმატში ორმხრივად იმისათვის, რომ ეს ვიზიტები, ორმხრივი თანამშრომლობა კონკრეტულ შედეგებში იყოს ტრანსფორმირებული. ძალიან მნიშვნელოვანი იქნება საქართველოსთვის ისეთი ქვეყნის მხარდაჭერა, როგორიც შვეიცარიაა სხვადასხვა მიმართულებით, როგორც პოლიტიკური, ასევე ეკონომიკური და სოციალური მხარდაჭერის კუთხით“, - აღნიშნა ეკა ბესელიამ.

საპარლამენტო უმცირესობის წევრის, სერგო რატიანის განცხადებით, შვეიცარიის კონფედერაციაში საკმაოდ მნიშვნელოვანი ვიზიტი შედგა, რომლის დროსაც მხარეებს შორის საკითხების ფართო სპექტრი იყო განხილული. ,,საკმაოდ მნიშვნელოვანი ვიზიტი იყო, რადგან შვეიცარია თამაშობს ძალიან მნიშვნელოვან როლს რუსეთთან ურთიერთობაში. გვქონდა საუბრები ჩვენს პარტნიორებთან როგორც საშინაო პოლიტიკასთან, ისე საგარეო პოლიტიკასთან დაკავშირებით. მათ სრულიად გაცნობიერებული აქვთ, რომ ჩვენი ურთიერთობები და მიმართებები რუსეთთან არის ნაწილი ევროპული ინტეგრაციისა. მნიშვნელოვანია, ასევე საქართველოში დემოკრატიის განვითარება და ამ მიმართულებითაც მუშაობა. გარდა ამისა, საუბრები გვქონდა ქვეყნის განვითარებასა და დეცენტრალიზაციასთან დაკავშირებით“, -განაცხადა სერგო რატიანმა.