პარტია „თავისუფალი დემოკრატების“ ყოფილი წევრები მხარდამჭერებს მოუწოდებენ, მეორე ტურში მხარი „ქართული ოცნების“ კანდიდატებს დაუჭირონ.

ამის შესახებ ერთობლივი განცხადება დღეს, პარლამენტში გამართულ პრესკონფერენციაზე დავით ონოფრიშვილმა, ზურაბ აბაშიძემ და გიორგი ცაგარეიშვილმა გააკეთეს. მათ ასევე მხარდამჭერებს მოუწოდეს, საპარლამენტო არჩევნების მეორე ტურში ხმა მისცენ „თავისუფალი დემოკრატების“ კანდიდატს ჭიათურაში, თემურ გაფრინდაშვილს.

„პრაქტიკულად ყველგან დარჩენილია ორი პარტიის კანდიდატი: კოალიცია „ქართული ოცნების“ და „ნაციონალური მოძრაობის“. აქ ალტერნატივა არ არსებობს და მე ჩემს მხარდამჭერებს, თანამოაზრეებს მოგიწოდებთ, მხარი დაუჭიროთ „ქართული ოცნების“ კანდიდატებს, რადგან ჩვენ ყველამ ერთად, 2012 წელს ერთად მივიღეთ ის გადაწყვეტილება, რომ „ნაციონალური მოძრაობა“ სამუდამოდ უნდა წასულიყო მინიმუმ ოპოზიციაში და, შეიძლება, პოლიტიკიდანაც“, - განაცხადა დავით ონოფრიშვილმა.

„საკონსტიტუციო უმრავლესობა ბოროტად იყო გამოყენებული ერთი პოლიტიკური ძალის, ერთი პიროვნების ხელში. ვფიქრობ, რომ კონსტიტუცია ძალიან ბევრი მიმართულებით, ერთმნიშვნელოვნად შესაცვლელია. ასევე ვიმედოვნებ, რომ გიორგი კვირიკაშვილის მთავრობის პირობებში, თუკი საკონსტიტუციო უმრავლესობას მოიპოვებენ, ეს ბოროტად გამოყენებული არ იქნება და მიმართული იქნება, ქართული სახელმწიფოს აღმშენებლობისკენ. დიდუბის მე-15 ოლქში კენჭს ვიყრიდი და ჩემი მხარდამჭერები მეორე ტურთან დაკავშირებით ჩემს პიროვნულ დამოკიდებულებას ელოდებიან - მათ მოვუწოდებ, მხარი ხელისუფლების კანდიდატს დაუჭირონ. ჩვენ მხარს “ნაციონალურ მოძრაობის“ წარმომადგენლებს არასოდეს ვუჭერდით და მცდარ პოზიციად მიმაჩნია არც ერთის მხარდაჭერა, რადგან ეს იმას ნიშნავს, რომ ეს ისევ “ნაციონალური მოძრაობის“ წისქვილზე დაასხავს წყალს“, - განაცხადა ზურაბ აბაშიძემ.

გიორგი ცაგარეიშვილმა ჟურნალისტებსა და საქართველოს პარლამენტის აპარატს მადლობა გადაუხადა წლების განმავლობაში აქტიური თანამშრომლობისთვის.