განათლების სისტემა, როლი და მნიშვნელობა იყო ძირითადი საკითხი, რომლის შესახებაც განათლების, მეცნიერებისა და კულტურის კომიტეტის თავმჯდომარის პირველმა მოადგილემ, ალექსანდრე ქანთარიამ სტაჟიორებთან დღეს გამართულ შეხვედრაზე ისაუბრა.

დეპუტატმა ახალგაზრდებს საქართველოს განათლების სფეროში არსებული პრობლემები და გამოწვევები გააცნო და ყურადღება როგორც საშუალო, ისე უმაღლესი განათლების სისტემის რეფორმირების აუცილებლობაზე გაამახვილა. მისი განცხადებით, ევროატლანტიკურ სივრცეში სრულფასოვანი ინტეგრაცია შეუძლებელია განხორციელდეს, თუკი ქვეყნის განათლების სისტემა ევროპული სტანდარტების შესაბამისი არ იქნება და იგი კვალიფიციური კადრების მომზადებას არ უზრუნველყოფს.

შეხვედრაზე ალექსანდრე ქანთარიამ კომიტეტის კანონშემოქმედებითი საქმიანობის შესახებ ისაუბრა და რამდენიმე კანონპროექტსაც შეეხო, რომელზეც კომიტეტი ბოლო პერიოდის განმავლობაში მუშაობდა, კერძოდ, პარლამენტის წევრმა ,,სახელმწიფო ენის შესახებ“ კანონპროექტის მნიშვნელობაზე გაამხვილა ყურადღება.

სტაჟიორებმა კომიტეტის თავმჯდომარის მოადგილეს წინადადებით მიმართეს, რომ საჯარო სამსახურში სტაჟირება სამუშაო გამოცდილებად ჩაითვალოს. ალექსანდრე ქანთარიამ აღნიშნულ საკითხთან დაკავშირებით სტაჟიორებს ერთობლივი მუშაობის დაწყება შესთავაზა.

პარლამენტის წევრმა ახალგაზრდების შეკითხვებსაც უპასუხა, რომლებიც საუნივერსიტეტო განათლებისა და სამეცნიერო-კვლევითი ინტიტუტების რეფორმირების, ასევე პროფესორ-მასწავლებლების გადამზადებისა და კვალიფიკაციის ხარისხის ამაღლების საკითხებს შეეხებოდა.

შეხვედრის ბოლოს, დეპუტატმა სტაჟიორებს წარმატებები უსურვა და კომიტეტის სხდომებზე ინტენსიური დასწრება ურჩია. ,,მაქსიმალურად გამოიყენეთ თქვენი პარლამენტში ყოფნის პერიოდი, რათა შეიძინოთ გარკვეული ცოდნა და გამოცდილება. დაისახეთ კონკრეტული მიზანი, რაც ღირსეულად ცხოვრებასა და სამართლებრივი სახელმწიფოს შექმნაში დაგეხმარებათ“, - მიმართა ახალგაზრდებს კომიტეტის თავმჯდომარის პირველმა მოადგილემ.

სტაჟირება საქართველოს საკანონმდებლო ორგანოში რამდენიმე წელია მიმდინარეობს. 2015 წელს პარლამენტს 24 სტაჟიორი ჰყავს, რომლებიც სტაჟირებას პარლამენტის აპარატის სხვადასხვა სტრუქტურულ ერთეულში გადიან. სტაჟიორები საპარლამენტო საქამიანობაში აქტიურად არიან ჩართულნი, ისინი კომიტეტების სხდომებს ესწრებიან და დეპარტამენტების მუშაობის სპეციფიკასაც ეცნობიან. 

სტაჟირების პროცესი პარლამენტის ცალკეული კომიტეტების, საპარლამენტო ფრაქციების, უმრავლესობისა და უმცირესობის ლიდერებთან, ასევე საქართველოს პარლამენტის ცალკეულ წევრებთან შეხვედრებსაც ითვალისწინებს, რომელთა ორგანიზებას საკადრო საკითხთა დეპარტამენტი ახორციელებს.