დღეს, პარალამენტის თავმჯდომარის მოადგილე, გუბაზ სანიკიძე და დიასპორისა და კავკასიის საკითხთა კომიტეტის თავმჯდომარის პირველი მოადგილე, შალვა კიკნაველიძე ირანის ისლამური რესპუბლიკის მეჯლისის (პარლამენტის) ეროვნული წარმოების მხარდაჭერისა და შესაბამისი პოლიტიკის განხორციელების მონიტორინგის საგანგებო კომისიის თავმჯდომარესა და წევრებს შეხვდნენ.

ვენის შეთანხმების წარმატებით დასრულების შემდეგ, საქართველო-ირანის ურთიერთობები აქტიურ ფაზაში გადავიდა. სწორედ ამ ურთიერთობების გაღრმავებას და თანამშრომლობის უფრო მეტ გააქტიურებას ეხებოდა ირანის ისლამური რესპუბლიკის საპარლამენტო ჯგუფის ვიზიტი საქართველოში.

შეხვედრაზე მხარეებმა საქართველოსა და ირანის რესპუბლიკის ორმხრივ ურთიერთობებზე და ენერგეტიკის, ეკონომიკის, ტურიზმის, განათლებისა და ჯანდაცვის სფეროებში თანამშრომლობის პერსპექტივებზე ისაუბრეს. სტუმრები ასევე საქართველოს ეკონომიკური პოტენციალით დაინტერესდნენ.

გუბაზ სანიკიძის განცხადებით, შეხვედრაზე კონკრეტულ პროექტებზეც იყო საუბარი. „ვისაუბრეთ მეგა-პროექტებზე, როგორიცაა ენერგომატარებლების გატარება ჩვენი პორტების საშუალებით. სტუმრებმა დიდი სურვილი გამოთქვეს საქართველოდან მიიღონ სარწყავი წყალი. თვლიან, რომ საქართველოში ძალიან მიმზიდველი გარემოა ინვესტიციების განხორციებისათვის. საუბარი იყო სხვა საკითხებზეც, ძირითადად, ეკონომიკურ პროექტებზე, რაც ძალიან სერიოზულია და ვფიქრობ, ჩვენი ქვეყნისთვის ძალიან პერსპექტიული. ვთვლი, რომ შეხვედრა საინტერესო იყო ჩვენთვისაც და მათთვისაც“, - განაცხადა გუბაზ სანიკიძემ. 

დელეგაციის წევრები ბიზნესის წარმოებისა და ეკონომიკური წინსვლის მიმართულებით არსებული ქართული კანონმდებლობითაც დაინტერესდნენ. „ეს არის საპარლამენტო ჯგუფის ვიზიტი, რომელსაც აინტერესებს ჩვენს ქვეყნებს შორის ეკონომიკური ურთიერთობა, ეკონომიკური პოტენციალი. აინტერესებთ თუ რა სფეროებია მნიშვნელოვანი საქართველოში ეკონომიკური მიმართულებით. მათ ასევე აქვთ სურვილი გაეცნონ საქართველოს გამოცდილებას ბიზნესის წარმოების სიმარტივის კუთხით და სწორედ ამ მიმართულებით იგეგმება მათი შეხვედრები სხვადასხვა სფეროების წარმომადგენლებთან“, - განაცხადა შეხვედრის დასრულების შემდეგ შალვა კიკნაველიძემ.

დიასპორისა და კავკასიის საკითხთა კომიტეტის თავმჯდომარის პირველი მოადგილის, შალვა კიკნაველიძის განცხადებით, უახლოეს მომავალში, ირანის ისლამურ რესპუბლიკაში, საქართველოს პარლამენტის ირანთან მეგობრობის ჯგუფის ვიზიტია დაგეგმილი.