დიასპორისა და კავკასიის საკითხთა კომიტეტის თავმჯდომარე, გუბაზ სანიკიძე ჩერქეზული (ადიღეური)კულტურის ცენტრის დირექტორს, პროფესორ. მერაბ ჩუხუას შეხვდა, სადაც მხარეებმა ქართულ-კავკასიურ ურთიერთობებზე, არსებულ პრობლემებსა და პერსპექტივებზე ისაუბრეს.

„ჩვენთვის ძვირფასია ის განვლილი გზა, რაც ქართველებმა და კავკასიელებმა დღემდე გაიარეს. ყოველივე ეს მოითხოვს სამეცნიერო შესწავლას. ამ მიმართულებით ცენტრმა უკვე შექმნა, რამდენიმე წიგნი. ზოგი მათგანი გამოცემულია ინგლისურ ენაზე, ზოგი გვაქვს ელექტრონული სახით. ჩვენ ვსაუბრობთ სამომავლო გეგმებზე, რათა სრულყოფილი იყოს ჩვენი ურთიერთობა, არა მხოლოდ კომიტეტსა და ცენტრს შორის კოორდინაციის, არამედ იმ გარემოს შორის, რაც საქართველოს ადგილმდებარეობიდან და ისტორიული ხვედრიდან გამომდინარე არსებობს. იმისთვის, რომ განვითარდეს ურთიერთობა ჩრდილო კავკასიელ ხალხებთან, ჩვენს ხელთ არსებული წარმატებული კავშირები კიდევ უფრო მეტად უნდა იყოს მიმართული საქართველოს წინსვლის, სიძლიერისა და პროგრესისკენ - კავკასიური მიმართულებით“, - აღნიშნა მერაბ ჩუხუამ.

დღევანდელ შეხვედრას ქართულ-ხუნძური ასოციაციის ხელმძღვანელი მარკო ხაფეზოვიც ესწრებოდა. სტუმარმა კომიტეტის თავმჯდომარეს განხორციელებული პროექტების შესახებ ინფორმაცია მიაწოდა. როგორც მან აღნიშნა, ავარულ ენაზე უკვე გადათარგმნილია „ვეფხისტყაოსანი“. შექმნილია ავარულ-ქართული ლექსიკონი, მიმდინარეობს მუშაობა ქართველი კლასიკოსების ნაწარმოებების თარგმნაზე. მან სურვილი გამოთქვა ზაქათალაში ავარული კულტურული ცენტრის შექმნის შესახებ.

„ჩრდილო კავკასიელ ძმებთან კარგი ურთიერთობა პირველ რიგში, ეს არის ჩვენი ქვეყნის უსაფრთხოება. ჩვენ კი არ უნდა გავხდეთ ევროპელები, არამედ უნდა გავხდეთ კავკასიელი ევროპელები. ჩვენი კავკასიელი ძმებისთვის ბევრი უნდა გავაკეთოთ. ამ მიმართულებით კომიტეტი გრძნობს მხარდაჭერას როგორც პარლამენტის თავმჯდომარის, ასევე საქართველოს მთავრობის, განსაკუთრებით კი, პრემიერ-მინისტრ ირაკლი ღარიბაშვილისგან“, - განაცხადა გუბაზ სანიკიძემ.

დღევანდელ შეხვედრაზე დაიგეგმა, რომ მალე გაიმართება კომიტეტის გაფართოებული სხდომა, სადაც მოწვეული იქნებიან ექსპერტები და განსახორციელებელ პროექტებს ერთად განიხილავენ.