დიასპორისა და კავკასიის საკითხთა კომიტეტის თავმჯდომარის, გუბაზ სანიკიძე ჩრდილოკავკასიელი ხალხების წარმომადგენლებს და სათვისტომოს წევრებს შეხვდა
ქართულ-ჩერქეზული ურთიერთობები, ქართული და ჩრდილოკავკასიური დიასპორების კავშირები, მათი თანამშრომლობის პერსპექტივები და არსებული პრობლემები იყო შეხვედრის მთავარი თემა, რომელიც დღეს, დიასპორისა და კავკასიის კომიტეტის თავმჯდომარესა და ჩრდილოკავკასიელი ხალხის წარმომადგენლებს შორის გაიმართა. შეხვედრას ჩერქეზული(ადიღეური) კულტურის ცენტრის დირექტორი, პროფესორი მერაბ ჩუხუაც ესწრებოდა.
საუბარი ქართველთა და ჩერქეზთა მრავალსაუკუნოვან ურთიერთობას შეეხო და ითქვა, რომ აუცილებელია როგორც ქართულ-ჩერქეზული, ასევე საერთოდ ქართულ-ჩრდილოკავკასიურ ურთიერთობათა, განსაკუთრებით კულტურული კავშირების აღდგენა და გაღრმავება, სამეცნიერო წრეების დაახლოება. ყურადღება გამახვილდა კულტურული და საგანმანათლებლო კავშირების მნიშვნელობაზე. შეხვედრაზე კავკასიის რეგიონის სტუდენტების მიერ საქართველოს უმაღლეს სასწავლებლებში განათლების მიღების ხელშეწყობის საკითხები განიხილეს.
დიასპორისა და კავკასიის საკითხთა კომიტეტის თავმჯდომარემ, გუბაზ სანიკიძემ იმედი გამოთქვა, რომ ქართველებსა და ჩერქეზებს შორის არსებული ისტორიული კავშირები კიდევ მეტად გაღრმავდება. მისი განცხადებით: “მზად ვართ ამ თანამშრომლობისათვის, რადგან ჩვენს მეზობლებთან მეგობრული და ჰარმონიული ურთიერთობები საქართველოსთვის ძალიან მნიშვნელოვანია და ამ ურთიერთობების გარეშე საქართველო სრულყოფილი სახელმწიფო ვერ იქნება“. თავის მხრივ იბრაჰიმ იაგანოვმა მნიშვნელოვანი უწოდა იმ ფაქტს, რომ დღეს ქართველთა და ჩერქეზთა შორის კულტურულ-მეცნიერული კავშირების აღორძინება ხდება და იმედი გამოთქვა, ეს ურთიერთობა მომავალში კიდევ უფრო გაფართოვდება და გააქტიურდება.
