საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, ზურაბ ტყემალაძე დღეს ჩეხეთის რესპუბლიკის ინდუსტრიისა და ვაჭრობის მინისტრს, იან მლადეკს შეხვდა.
 
ზურაბ ტყემალაძემ სტუმარს კომიტეტის საქმიანობა გააცნო და იმ სფეროების შესახებ ისაუბრა, რომლებიც კომიტეტის საქმიანობის არეალში შედის. მან ასევე გააცნო სტუმრებს საქართველოს ეკონომიკური განვითარების დინამიკა და ისაუბრა რამდენად ახდენს გავლენას ამ პროცესზე რეგიონში და მთლიანად ევროპაში მიმდინარე მოვლენები. 

იან მლადეკის თქმით ჩეხეთი საქართველოსთვის საიმედო პარტნიორია ევროკავშირთან ინტეგრაციის პროცესში და აღნიშნა, რომ ორ ქვეყანას შორის თანამშრომლობისა და პარტნიორობისთვის ხელსაყრელი პირობები არსებობს. მისივე თქმით, „ჩეხეთის ინდუსტრია და ეკონომიკა ვითარდება და წინ მიიწევს, ჩვენ შესაძლებლობა გვაქვს ვითანამშრომლოთ მშენებლობის და მრეწველობის სხვადასხვა დარგებში, ასევე შეგვიძლია მონაწილეობა მივიღოთ როგორც სარკინიგზო ტრანსპორტის ასევე ავტობუსების შემოყვანის ტენდერებში, გვაქვს მაღალი ხარისხის ბროლის და შუშის ნაწარმი, ვაწარმოებთ მრავალფუნქციურ საწოლებს საავადმყოფოებისთვის“.

სტუმარმა ასევე ისაუბრა სავიზო რეჟიმის გამარტივების, ტურიზმის სფეროში თანამშრომლობისა და ქართული ღვინის ექსპორტის პერსპექტივაზეც.
 
კომიტეტის თავმჯდომარის მოადგილემ, თემურ მაისურაძემ კომიტეტთან არსებული საინოვაციო საბჭოს მიერ გაწეული საქმიანობის და იმ პროექტების შესახებ ისაუბრა, რომლებიც ტექნოლოგიურ წინსვლას უწყობს ხელს. 

ჩეხეთის რესპუბლიკის დელეგაციის შემადგენლობაში ასევე შედიან პარლამენტის წევრები და ბიზნესის წარმომადგენლებიც. შევედრაზე ითქვა, რომ კარგი იქნება თუ ჩეხეთის პარლამენტის ეკონომიკური კომიტეტისა და საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტს შორის უფრო მჭიდრო საქმიანი ურთიერთობა დამყარდება.