პარლამენტის თავმჯდომარის მოადგილე კახაბერ კუჭავა იაპონიის საგანგებო და სრულუფლებიან ელჩს საქართველოში, ტადაჰარუ უეჰარას შეხვდა
პარლამენტის თავმჯდომარის მოადგილე კახაბერ კუჭავა საქართველოში იაპონიის საგანგებო და სრულუფლებიან ელჩს, ტადაჰარუ უეჰარას შეხვდა.
საუბრის მთავარი თემები იყო საქართველოსა და იაპონიას შორის ეკონომიკური თანამშრომლობის გაღრმავება, საქართველოს საინვესტიციო გარემო და იაპონიის მხრიდან, განსაკუთრებით ბოლო წლების განმავლობაში, გააქტიურებული კერძო ინვესტიციები და ამ მიმართულებით ურთიერთობების კიდევ უფრო გაღრმავება.
„ძალიან დიდია იაპონური კომპანიების დაინტერესება საქართველოს ბაზრის მიმართ ისევე, როგორც ქართული პროდუქციის იაპონიაში ექსპორტით“, - განაცხადა შეხვედრის დასრულების შემდეგ კახაბერ კუჭავამ.
შეხვედრაზე, მხარეებმა, ასევე, ისაუბრეს იაპონიის გამოცდილებაზე, რაც მათ აქვთ მზისა და ქარის ენერგიების გამოყენების კუთხით და საქართველოსა და იაპონიას შორის ამ მიმართულებითაც მომავალ შესაძლო თანამშრომლობის შესახებ.
საქართველოს პარლამენტის თავმჯდომარის მოადგილემ, კახაბერ კუჭავამ იაპონიის ელჩს, საქართველოს პარლამენტის სახელით, მიულოცა იაპონიის ახალი პრემიერ-მინისტრის, იოშიჰიდე სუგას არჩევა და წარმატება უსურვა მას მომავალ საქმიანობაში.
პარლამენტის თავმჯდომარის მოადგილემ აღნიშნა, რომ საუბარი, ასევე, შეეხო ქვეყნის წინაშე მდგარ გამოწვევებს.
„ჩვენ მადლობელი ვართ იაპონიის მიერ საქართველოს ტერიტორიული მთლიანობისა და სუვერენიტეტის მხარდაჭერისთვის. საუბრის ერთ-ერთი თემა, რა თქმა უნდა, მომავალი საპარლამენტო არჩევნები იყო. იაპონიის ელჩმა გამოხატა მოლოდინი, რომ საარჩევნო პროცესი ჩაივლის დემოკრატიულ და თავისუფალ გარემოში და შემდეგი მოწვევის პარლამენტი უფრო აქტიურად ითანამშრომლებს იაპონიის პარლამენტთან“, - განაცხადა კახაბერ კუჭავამ.
