საქართველოს ევროპასთან ინტეგრაცია, ეროვნული უსაფრთხოება და ქვეყანაში მიმდინარე სოციალურ-პოლიტიკური საკითხები იყო ძირითადი თემა, რის შესახებაც ევროპასთან ინტეგრაციის კომიტეტის წევრი ვიქტორ დოლიძე პარლამენტში სტაჟირებაზე მყოფ ახალგაზრდებსა და პრაქტიკანტებს ესაუბრა.

დეპუტატმა შეხვედრაზე ყურადღება ჩრდილოატლანტიკურ ალიანსთან ურთიერთობასა და ევროპულ სტრუქტურებში ინტეგრაციის მნიშვნელობაზე, ასევე ამ პროცესებში არსებულ სირთულეებსა და გამოწვევებზე გაამახვილა. მისი ინფორმაციით, ნატოსთან დაახლოების კუთხით წარმატებული ნაბიჯები გადაიდგა, რასაც უელსის სამიტზე მიღებული პაკეტი ადასტურებს. მისივე განცხადებით, ევროკავშირთან სავიზო რეჟიმის ლიბერალიზაცია და მის წევრ ქვეყნებთან უვიზო მიმოსვლა საქართველოს ევროპულ სტრუქტურებთან დაახლოების ჭრილში ნაყოფიერი და სასარგებლო იქნება.

საქართველოს ეროვნულ უსაფთხოებასა და თავდაცვის საკითხებზე საუბრისას, ვიქტორ დოლიძემ სამხედრო-პოლიტიკურ სფეროში ჯარისკაცებისთვის სპეციალური საგანმანათლებლო პროგრამების აუცილებლობას გაუსვა ხაზი და აღნიშნა, რომ განათლების გარეშე შეუძლებელია სერიოზული წარმატების მიღწევა ნატოსა და ევროკავშირთან დაახლოების გზაზე.

პარლამენტის წევრი ქვეყანაში მიმდინარე აქტუალურ საკითხებსაც შეეხო და აქცენტი ეროვნული ვალუტის გაუფასურებასა და ამ პროცესში უკრაინის ფაქტორზე, ასევე მთავრობის ეკონომიკურ პოლიტიკაზე, კოორდინირებული მუშაობის მნიშვნელობაზე და კრიზისიდან გამოსვლის საშუალებებზე გააკეთა.

შეხვედრის ბოლოს, ვიქტორ დოლიძემ სტაჟიორებისა და პრაქტიკანტების შეკითხვებს უპასუხა, რომლებიც საქართველოს საგარეო ურთიერთობების გარდა ქვეყნის შიგნით მიმდინარე გამოწვევებს, ასევე კანონშემოქმედებით საქმიანობას შეეხებოდა.

დასასრულს, დეპუტატმა ახალგაზრდებს წარმატებები უსურვა და სხვადასხვა თემებზე სასაუბროდ შემდეგი შეხვედრების ორგანიზების სურვილი გამოთქვა.

სტაჟირება და პრაქტიკა საქართველოს საკანონმდებლო ორგანოში რამდენიმე წელია მიმდინარეობს. 2015 წელს პარლამენტს 24 სტაჟიორი და 35 პრაქტიკანტი ჰყავს, რომლებიც საპარლამენტო საქმიანობაში აქტიურად არიან ჩართული, ესწრებიან კომიტეტების სხდომებს და დეპარტამენტების მუშაობის სპეციფიკასაც ეცნობიან. 

სტაჟირებისა და პრაქტიკის პროცესი პარლამენტის ცალკეული კომიტეტების, საპარლამენტო ფრაქციების, უმრავლესობისა და უმცირესობის ლიდერებთან, ასევე საქართველოს პარლამენტის ცალკეულ წევრებთან შეხვედრებსაც ითვალისწინებს, რომელთა ორგანიზებას საკადრო საკითხთა დეპარტამენტი ახორციელებს.